Կուբանում ավտոբուսը ծովն է ընկել: Պատահարի հետեւանքով 18 մարդ է զոհվել: Ռոստովում Հայաստանի գլխավոր հյուպատոսության տեղեկացմամբ՝ զոհերի թվում երկու հայ կա՝ Ս. եւ Ա. Բուդուլյանները: Նրանք հայր ու որդի են: Ճշտված տվյալներով՝ Բուդուլյանները Հայաստանի քաղաքացի չեն:
Ականատեսները պատմել են, որ պատահարի պատճառն արգելակների խափանումն է եղել։ Վարորդը փորձել է փոխանցման տուփի միջոցով արգելակել, բայց այն մասերի է բաժանվել: Արդյունքում մեքենան բախվել է ճանապարհի բետոնե արգելապատնեշին ու ծովն ընկել: Նախնական տվյալներով՝ ավտոբուսում 41 մարդ է եղել. 18 մարդ մահացել է, 24 տուժած՝ հոսպիտալացվել, մեկ մարդ անհետ կորած է համարվում:
Ձերբակալվել է եզդիաբնակ Շամիրամ գյուղում սպանդ իրականացնելու մեջ մեղադրվող Թելման Քալաշյանը: Նրան հայտնաբերել են Արմավիրի մարզի Ջանֆիդա եւ Նալբանդյան գյուղերի միջնամասում ու բերման ենթարկել:
Դեպքը տեղի էր ունեցել օգոստոսի 1-ին Արագածոտնի մարզի Շամիրամ գյուղում: Նախնական տվյալներով՝ Քալաշյանը կենցաղային վեճ՝ պարտք ու պահանջ է ունեցել մի քանի անձանց հետ, գնացել է Շամիրամ գյուղի գերեզմանատանը կից սգո սրահ ու «Սայգա» տիպի որսորդական հրացանից կրակ բացել հավաքվածների ուղղությամբ: Արյունալի միջադեպի հետեւանքով 4 մարդ մահացել է, 7-ը՝ տարբեր աստիճանի մարմնական վնասվածքներ ստացել: Դեպքից հետո Թելման Քալաշյանն իր ավտոմեքենայով փախուստի էր դիմել:
Սարդարապատի հուշահամալիրում այսօր պաշտպանության նախարարության ռազմական ուսումնական հաստատությունների 279 շրջանավարտներ հավաստագրեր են ստացել: Նրանց առաջին սպայական՝ «լեյտենանտ»-ի կոչում է շնորհվել: Նշենք, որ շրջանավարտների հիմնական մասը, որոնք այսօր հավաստագրեր են ստացել, ապրիլյան պատերազմի մասնակից են: Նրանց մեծ մասը ծառայության է մեկնելու Արցախ: Միջոցառմանը մասնակցել ու ելույթ է ունեցել նաեւ նախագահ Սերժ Սարգսյանը: Միջոցառումն ավարտվել է մարտական դրոշներին շրջանավարտների հրաժեշտի արարողությամբ եւ հանդիսավոր քայլերթով:
Կոտայքի մարզում դաժան սպանություն է տեղի ունեցել: Հիվանդանոց տեղափոխված Նոր Հաճնի 61-ամյա բնակիչ Վալեր Մարգարյանը մահացել է: Նրան ալկոհոլի ազդեցությամբ ծեծել, հետո խեղդամահ է արել հարազատ քրոջ որդին՝ 31-ամյա Հովակիմ Ղանդիլյանը: Նա բերման է ենթարկվել: Մահացածը Ռուսաստանի քաղաքացի է, երկար տարիներ այդ երկրում է բնակվել եւ վերջերս էր Հայաստան վերադարձել: Մարգարյանի բացակայության տարիներին նրա տանը բնակվել են քույրն ու 31-ամյա զարմիկը:
Գյումրիում տեղի ունեցած ողբերգական պատահարի հետեւանքով մահացել է 29-ամյա ըմբիշ Տիգրան Թորոսյանը: Նա հունահռոմեական ըմբշամարտի Հայաստանի հավաքականի անդամ էր, հանդես էր գալիս 66 կգ քաշային կարգում: Դեպքը տեղի է ունեցել Գյումրու Մուշ թաղամասում: Թորոսյանն իր BMW մակնիշի ավտոմեքենայով դուրս է եկել ճանապարհի երթեւկելի գոտուց, մի քանի պտույտ կատարելով՝ կողաշրջվել: Տիգրան Թորոսյանը տեղում մահացել է, մեքենայի ուղեւորը մարմնական վնասվածքներով հիվանդանոց է տեղափոխվել:
63 տարեկանում մահացել է ֆրանսիացի հայտնի ռեժիսոր, սցենարիստ եւ դերասան Ալեն Բերբերյանը: Հայազգի դերասանի մահվան պատճառը ծանր հիվանդությունն է: Բերբերյանը հոսպիտալացվել է անցյալ շաբաթ եւ մահացել երեքշաբթի: Մամուլն այդ մասին միայն այսօր է իմացել: Ֆրանսիական կինոյի սիրահարներին Ալեն Բերբերյանը հայտնի է որպես մի շարք կատակերգական մարտաֆիլմերի ռեժիսոր, ինչպիսիք են «Վախի քաղաք»-ն ու «Կատարյալ կալանք»-ը: Նա նաեւ նկարահանել է «Կորսիկացին» ֆիլմը, որտեղ գլխավոր դերերում հանդես են եկել Ժան Ռենոն ու Քրիստիան Կլավյեն:
Շառլ Ազնավուրը Հոլիվուդի «Փառքի ծառուղում» իր աստղն ունի: Երեկ նա մասնակցել է բացման հանդիսավոր արարողությանը: Սա 2618-րդ աստղն է «Փառքի ծառուղում»: Արարողության ժամանակ ունեցած ելույթում Ազնավուրը հայտարարել է, թե ուրախ է, որ երկու տարբեր՝ հայկական եւ ֆրանսիական մշակույթների կրող է: Իսկ այսօր արդեն հայտնի դարձավ, որ Ազնավուրը որոշել է 2018 թվականի համերգային շրջագայության երթուղին: Շանսոնյեն լինելու է Ֆրանսիայի վեց քաղաքներում՝ Լիոնում, Մարսելում, Բորդոյում, Թուլուզում, Նանտում եւ Լիլում: Համերգային շրջագայությունը կմեկնարկի հունվարի 20-ին եւ կավարտվի փետրվարի 6-ին: Հատկանշական է, որ Ֆրանսիայում Ազնավուրը վերջին անգամ համերգներով շրջել է յոթ տարի առաջ:
Դոլարի ու եվրոյի վերելքը շարունակվում է, ռուբլու փոխարժեքն անփոփոխ է: Դոլարի փոխարժեքն օգոստոսի 25-ին կազմել է 478 դրամ, եվրոյինը՝ 565, ռուբլունը՝ 8 դրամ 10 լումա, ֆունտինը՝ 614 դրամ:
Օգոստոսի 26-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի, իսկ օգոստոսի 28-29-ին 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +34+35 աստիճան տաքություն: