2017թ. Հայաստանում տնտեսական աճը նախատեսվածից ավելի քան 1 տոկոսով բարձր կլինի եւ կկազմի 4,3 տոկոս: Այս մասին հայտարարել է ֆինանսների նախարար Վարդան Արամյանը՝ ամփոփելով իր պաշտոնավարման 1 տարին: Նախարարը սա բացատրում է Կառավարության խելամիտ քաղաքականությամբ եւ արտաքին միջավայրի բարելավմամբ: Ի դեպ, հենց արտաքին միջավայրի ազդեցությունը մեղմելու համար է, ըստ Արամյանի, կառավարությունըվերջին 2 տարիներին էապես մեծացրել արտաքին պարտքը:
Այնուամենայնիվ, Արամյանը վստահեցրեց, որ արտաքին պարտքի շեմը մտահոգիչ չէ, ընդհանուր պետական պարտքն այս տարվա վերջին կկազմի ՀՆԱ-ի 58,8 տոկոսը: Անդրադառնալով տնտեսության առանձին ճյուղերի ցուցանիշներին՝ նախարարը նշել է, որ բոլոր ոլորտներում աճ է գրանցվել, բացի գյուղատնտեսությունից եւ շինարարությունից: Ընդ որում, Արամյանն ակնարկել է, որ այս ոլորտներում ոչ թե ռեալ անկում է եղել, այլ նախորդ տարիներին ցուցանիշներն ուռճացված են եղել:
Սամվել Բաբայանի գործով դատական նիստին որպես իրեղեն ապացույց այսօր դատարան է բերվել «Իգլան», որը Վրաստանից Հայաստան ապօրինի տեղափոխելու մեջ էլ մեղադրվում է Արցախի պաշտպանության նախկին նախարարը: Մեղադրողն ու պաշտպանները հերթով մոտեցել են սեղանին դրված խողովակին՝ փորձելով հասկանալ, թե որքանով է այն զենիթահրթիռային համալիր: Սամվել Բաբայանը հայտարարել է, որ դատարան բերված խողովակը զենք չի կարելի անվանել, քանի որ այն մարտկոց չունի, եւ զինամթերքի միայն մի մասն է: Մինչդեռ ըստ փորձաքննության արդյունքների՝ «Իգլան» տեխնիկապես սարքին է եւ պիտանի նպատակային օգտագործման: Գործով իրեղեն ապացույց ճանաչված պլանշետում հայտնաբերված լուսանկարներից մեկում «Իգլա»-ի վրա դրված է «Օհանյան-Րաֆֆի-Օսկանյան» դաշինքի նախընտրական բուկլետը:
Գերմանիայում նախօրեին կայացած խորհրդարանական ընտրություններից հետո բարդ քաղաքական իրավիճակ է ստեղծվել: Թեեւ ընտրություններում հաղթել է Անգելա Մերկելի Քրիստոնեադեմոկրատական միությունը, գործող կանցլերին չի հաջողվի իր 33 տոկոսով ինքնուրույն բացարձակ մեծամասնություն կազմել Բունդեսթագում: Մարտին Շուլցի Սոցիալ-դեմոկրատական կուսակցությունը 21 տոկոս ձայնով երկրորդ տեղում է, սակայն նրա հետ կրկին կոալիցիա կազմելու շանս Մերկելը չունի: Շուլցն արդեն հայտարարել է, որ դառնում է ընդդիմություն: Ի դեպ, խորհրդարան է անցել նաեւ «Այլընտրանք Գերմանիայի համար» կուսակցությունը, եւ փաստորեն ֆաշիզմի դեմ հաղթանակից հետո առաջին անգամ խորհրդարան են մտել ազգայնականները: Մերկելը հայտնվել է անելանելի դրության մեջ. ազգայնականների հետ կոալիցիա կազմել նա չի ցանկանում, կանցլերի հույսը մյուս երեք փոքր կուսակցություններն են, այդ թվում՝ կանաչները: Խնդիրն այն է, որ բոլոր այս կուսակցություններն ավանդաբար ընդդիմադիր են եղել եւ գաղափարական լուրջ տարաձայնություններ ունեն նաեւ միմյանց հետ: Վերլուծաբանները չեն բացառում, որ Գերմանիան կհայտնվի քաղաքական ճգնաժամում:
Արցախի Կառավարության կառուցվածքում լուրջ փոփոխություններ են տեղի ունեցել: Նոր Սահմանադրության համաձայն, վարչապետի պաշտոնը վերացվել է, նրա գործառույթները կիրականացնի պետական նախարարը: Այս պաշտոնում նշանակվել է մինչեւ այս վարչապետի պաշտոնը զբաղեցնող Արայիկ Հարությունյանը: Փոխվել է Արտաքին գործերի նախարարը. Կարեն Միրզոյանին փոխարինել է վերլուծաբան, երկար տարիներ ԱԳՆ-ում աշխատած Մասիս Մայիլյանը: Սա թերեւս նոր կառավարության միակ անսպասելի նախարարական նշանակումն էր:
Հրապարակվել է սեպտեմբերի 23-ին Երեւանի Դավիթ Բեկ փողոցում տեղի ունեցած 37 համարի ավտոբուսի վթարը: Կադրերում երեւում է՝ ինչպես է մեծ արագությամբ ընթացող ավտոբուսն անցնում խաչմերուկում գտնվող խոտածածկ տարածքի վրայով եւ հայտնվում դիմացի փողոցի տներից մեկի տանիքին: Բարեբախտաբար, ավտոբուսը դատարկ է եղել, վարորդը վնասվածքներով հիվանդանոց է տեղափոխվել: Նշենք, որ 2 օրվա ընթացքում Երեւանում հանրային տրանսպորտի մասնակցությամբ 4 վթար է տեղի ունեցել, որոնց հետեւանքով 27 մարդ է տուժել:
Երկար տարիների ընդմիջումից հետո Հայաստանում անցկացված «Միսս Արմենիա 2017» գեղեցկության մրցույթը մեծ աղմուկ է բարձրացրել սոցցանցերում: Օգտատերերի կարծիքով, մրցույթը վատ է կազմակերպված եղել, մասնակիցների հետ պրոսֆեսիոնալներ չեն աշխատել, սակայն ավելի մեծ աղմուկ է բարձրացրել առաջին տեղը զբաղեցրած Լիլի Սարգսյանը: Քննադատողներն ասում են, որ Լիլին մոդելային արտաքին չունի, իսկ մասնակիցների թվում կային աղջիկներ, որոնք ավելի մոտ էին միջազգային ստանդարտներին: Արժանի էր Լիլին մրցանակի, թե ոչ, հիմա արդեն կարեւոր չէ. մրցույթից անմիջապես հետո նրա թագը պատրաստած ոսկերչական ընկերությունը հետ է վերցրել այն, քանի որ նախապես պայմանավորված կարգով շոուի կազմակերպիչներն ընկերությանը չեն գովազդել: Կազմակերպիչների խոսքով, թագը մոտ 2 մլն դրամ արժե:
Եվրոն կտրուկ էժանացել է՝ միանգամից 5,5 դրամով: Սեպտեմբերի 25-ին եվրոյի փոխարժեքը կազմել է 567, դոլարինը՝ 477 դրամ: Ֆունտը 2 դրամով էժանացել է եւ կազմել 646 դրամ, ռուբլին կայուն է՝ 8,33 դրամ:
Սեպտեմբերի 26-ին Հանրապետության հյուսիսային շրջաններում սպասվում է կարճատև անձրև և ամպրոպ: Օդի ջերմաստիճանը 27-29-ը կնվազի 6-8 աստիճանով: Մայրաքաղաքում գիշերը կդիտվի +16+18, ցերեկը՝ +29+31 աստիճան տաքություն: