Կիեւի կենտրոնում այսօր՝ դեկտեմբերի 17-ին, տեղի է ունեցել «Նոր ուժերի շարժում» կուսակցության առաջնորդ Միխայիլ Սաակաշվիլիի «Իմպիչմենտի երթ» ակցիան, հաղորդում է 112 ua-ն։
Ակցիայի մասնակիցները Ուկրաինայի նախագահ Պյոտր Պորոշենկոյի իմպիչմենտի, «քաղաքական հետապնդումների» դադարեցման եւ հակակոռուպցիոն մարմինների վրա ճնշման պահանջներով կարգախոսներ են հնչեցրել:
Մայդանում երթից անմիջապես հետո մեկնարկել է «իմպիչմենտի» հանրահավաքը, որտեղ Սաակաշվիլին, պատգամավորներ Յուրի Դերեւյանկոն եւ Յուրի Լեւչենկոն ելույթով են հանդես եկել:
«Ես երբեք կանգ չեմ առել, ես խորապես շնորհակալ եմ ձեզ ինձ ազատելու համար, եւ ես ձեզ հետ միասին պարտավոր եմ ազատել Ուկրաինան թմրավաճառներից, կոռումպացվածներից եւ օլիգարխներից», -ասել է Սաակաշվիլին:
Ներկայումս Սաակաշվիլիի հազարից ավելի կողմնակիցները շարքեր են կազմել Կիեւի կենտրոնական փողոցներով կազմակերպված երթ անցկացնելու համար: Սաակաշվիլին հայտարարել է, որ ցուցարարները կշարժվեն Անկախության հրապարակ, որտեղ նա եւ այլ քաղաքական գործիչներ կհայտարարեն հետագա գործողությունների ծրագրի մասին: Նախկին նահանգապետը երթը անվանել է «Ուկրաինայի ժողովրդի խաղաղ երթ»:
Ցուցարարները պահանջում են ներկա իշխանություններից կատարել մի շարք պահանջներ, որոնց մեջ հիմնականը Գերագույն Ռադայի կողմից օրենքի ընդունումը պետք է լինի, որով կկարգավորվի Ուկրաինայի նախագահի լիազորությունների վաղաժամկետ դադարեցման գործընթացը (իմպիչմենտ): Այլ պահանջների թվում են նաեւ երկրում հակակոռուպցիոն դատարանի ձեւավորումը, ընտրությունների մասին նոր օրենքի ընդունումը, գլխավոր դատախազ Յուրի Լուցենկոյի հրաժարականը:
