Կատալոնիայի նախկին ղեկավար Կառլես Պուչդեմոնը հայտարարել է, որ Մադրիդի կողմից՝ Իսպանիայի սահմանադրության 155-րդ հոդվածի կիրառման պատճառով, որը թույլ է տվել սահմանափակել ինքնավարության ինքնակառավարումը, տարածաշրջանը կաթվածահար է եղել: Այս մասին հաղորդում է «ՏԱՍՍ»-ը` վկայակոչելով La Vanguardia թերթը:
Պուչդեմոնը մեկնաբանել է դեկտեմբերի 21-ին կայանալիք Կատալոնիայի ընտրություններից հետո իր՝ Իսպանիա վերադարձի հնարավորությունը. «Եթե ընտրությունների արդյունքները հարգվեն, եւ այդ արդյունքը կայանա նրանում, որ 155-րդ հոդվածը մերժվի կատալոնացիների կողմից, քանի որ այս ընտրությունները պլեբիսցիտ են (համաժողովրդական հանրաքվե) 155-րդ հոդվածի կապակցությամբ, ապա ես այլընտրանք չեմ ունենա», - նշել է տարածաշրջանի նախկին ղեկավարը:
Ըստ վերջինիս՝ այն, ինչ այժմ տեղի է ունենում ինքնավարությունում, 155-րդ հոդվածի արդյունքում առաջացած կաթվածահարություն է: Պուչդեմոնին նաեւ հարցրել են՝ նա կցանկանա, որպեսզի Գերմանիան, թե՞ Ռուսաստանը առաջինը ճանաչի Կատալոնիան: Այս հարցին նախկին առաջնորդը չի պատասխանել՝ նշելով. « Եթե ես խոսեի ՌԴ-ի կողմից ճանաչման մասին, դա երկիմաստության եւ հակասության կհանգեցներ, իսկ ես դրան ամենեւին չեմ ձգտում»:
Հիշեցնենք, որ հոկտեմբերի 27-ին Կատալոնիայի խորհրդարանը հաստատել է անկախ հանրապետության հռչակման մասին որոշումը, ինչից հետո Իսպանիայի կառավարության նախագահ Մարիանո Ռախոյը հայտարարել է, որ որոշում է կայացվել պաշտոնից հեռացնել Պուչդեմոնին եւ նրա կառավարության անդամներին: Բացի այդ, վարչապետը լուծարել է Կատալոնիայի խորհրդարանը եւ դեկտեմբերի 21-ին ինքնավար համայնքում ընտրություններ նշանակել:
Ինքնավարության նախկին ղեկավարը իր մի քանի համախոհների հետ միասին ներկայումս գտնվում է Բելգիայում: Իսպանիայի դատախազությունը մեղադրում է նրանց ապստամբության եւ պետական ունեցվածքի յուրացման մեջ: Ավելի վաղ Պիրենեյի Թագավորության Գերագույն դատարանը որոշում էր կայացրել չեղարկել Պուչդեմոնի ձերբակալության միջազգային հրամանը, սակայն ազգային հրամանը ուժի մեջ է: