Դատական օրենսգրքի՝ սահմանադրական օրենք լինել-չլինելու հարցն այսօր էլ խորհրդարանում բուռն քննարկումների առիթ է դարձել: Հիշեցնենք, որ նախօրեին առաջին ընթերցմամբ քվեարկության արդյունքը խառնաշփոթ առաջացրեց Ազգային ժողովում. խորհրդարանի խոսնակն այն 63 ձայնով ընդունված համարեց, իսկ «Ելք»-ը հայտարարեց, թե օրենքին կողմ է քվեարկել 61 պատգամավոր ու վերաքվեարկություն պահանջեց:
Ավելի ուշ Դավիթ Հարությունյանը պարզաբանել էր, որ Դատական օրենսգիրքը սահմանադրական օրենք չէ, ուստի դրա ընդունման համար 61 ձայնն էլ բավարար էր: Գեւորգ Կոստանյանն այսօր հեռակա խայթել է կուսակից նախարարին. դա կառավարության որոշելիք հարցը չէ:
«Ելք»-ից Արարատ Միրզոյանն էլ այդ առիթով «Կարգին հաղորդումն» է հիշել ու իշխանության ներկայացուցիչներին հորդորել կողմնորոշվել: «Ելք»-ի պատգամավորներին դուր չի եկել երեկվա քվեարկության մասին լրատվամիջոցներից մեկի անդրադարձը, թե խմբակցությունը լքել է նիստերի դահլիճը՝ առանց հասկանալու, թե ինչ օրինագիծ է քվեարկվում: Նիկոլ Փաշինյանին էլ զայրացրել է Դավիթ Հարությունյանի, իր խոսքով, «մուննաթը»:
Ամեն դեպքում, Դատական օրենսգրքում փոփոխությունների օրինագծի՝ առաջին ընթերցմամբ քվեարկությունը վավեր է համարվել, եւ Արա Բաբլոյանն այսօր այն երկրորդ ընթերցմամբ քվեարկության է դրել: Որպես բողոքի նշան՝ «Ծառուկյան» խմբակցությունը լքել է նիստերի դահլիճը: Օրինագիծը, ամեն դեպքում, 64 կողմ ձայնով ընդունվել է: Այդ ընթացքում Էդուարդ Շարմազանովը, ի դեպ, իրար էր անցել ու գործընկերներին շտապեցնում էր քվեարկել:
Նշենք, որ այսօրվա նիստի ընթացքում «Ելք» խմբակցությունը տասն անգամ 20 րոպե ընդմիջում է վերցրել: Սեյրան Սարոյանին սա զայրացրել է. փորձում են խաթարել խորհրդարանի աշխատանքը, բայց մեկ է՝ մեծամասնությունն իր գործն անում է: Սարոյանը նաեւ «փակել» է Ազգային ժողովի նիստը, բարեմաղթանքներ հնչեցրել ու հորդորել ում ձեռքն ինչ կա՝ ժողովրդին բաժանել:
Գործադիրի այսօրվա նիստում Կարեն Կարապետյանը հանձնարարել է խստացնել վերահսկողությունը գերիշխող ապրանքային շուկաներում: Ասում է՝ տոներին ընդառաջ սպառողական ապրանքների պահանջարկն ավելանում է, պետք է հսկել, որ գներն անհիմն չբարձրանան: Օրերս հայ-իրանական սահմանին բացվեց Մեղրիի ազատ տնտեսական գոտին: Բայց, ինչպես ասում են, թափը չպետք է կոտրել. վարչապետը հանձնարարել է հնարավորինս արագ ավարտել նաեւ աշխատանքների երկրորդ փուլը:
Հունվարի 1-ից խմելու ջրի սակագինը Հայաստանում ավելանալու է. 180 դրամից՝ 194.3 դրամ: Որպեսզի սակագնի բարձրացումը սպառողների համար բեռ չդառնա, կառավարությունը 2018 թվականին սուբսիդավորում կտրամադրի, որպեսզի սպառողները շարունակեն 180 դրամ վճարել: Բայց նման օգնություն բնակչությունը վերջին անգամ կստանա:
Կառավարությունը Ճապոնիայից 650 հազար դոլար կստանա, այս անգամ՝ դրամաշնորհի տեսքով: Այդ գումարով Պատմամշակութային ժառանգության գիտահետազոտական կենտրոնի համար նորագույն սարքավորումներ են ձեռք բերելու, որպեսզի վերականգնեն գտածոները: Վարչապետն ուզում է, որ դրանք նաեւ ներկայացվեն մեր քաղաքացիներին ու զբոսաշրջիկներին:
Պոլսո Հայոց պատրիարքի ընտրություններ չեն կարող տեղի ունենալ, Թուրքիայի իշխանությունը դրանք անցկացնելու արտոնություն չի տալիս: Երեւանում լրագրողների հետ հանդիպմանն Արամ արքեպիսկոպոս Աթեշյանը հայտարարել է, որ պետությունն իրեն է ճանաչում Պոլսո Հայոց պատրիարքի փոխանորդ: Ասում է՝ հայաստանյան մամուլը հաճախ մեղադրական հնչերանգով է անդրադառնում Թուրքիայի իշխող վերնախավի հետ իր մտերիմ հարաբերություններին: Բայց, վստահեցնում է, իր կապերը հայ համայնքի շահերին է ծառայեցնում: Փոխարենը, ըստ Աթեշյանի, ոչ ոք չի խոսում իր ձեռքբերումների, օրինակ՝ Աղթամարի Սուրբ Խաչ եկեղեցու վերաբացման եւ խաչի տեղադրման մասին:
Արամ արքեպիսկոպոսը պոլսահայերի շահով է բացատրում նաեւ գերմանական Բունդեսթագի կողմից Հայոց ցեղասպանության մասին բանաձեւի ընդունումից հետո Էրդողանին գրած աղմկահարույց նամակը: Հիշեցնենք, որ Աթեշյանը նամակում հայ համայնքի անունից քննադատել էր Գերմանիայի որոշումը՝ պնդելով, թե իմպերիալիստները հայկական հարցն ու հայերի վիշտն օգտագործում են իրենց շահերի համար: Վերջում Աթեշյանը կես-վիրավորված, կես-կշտամբանքով արձանագրել է. լրագրողներն անընդհատ ջանում են մեղադրել իրեն:
Գեղարքունիքի մարզում ավտովթարի հետեւանքով պայմանագրային զինծառայող է զոհվել: Ծովագյուղ-Վարդենիս ճանապարհին 42-ամյա Սամվել Կարճիկյանը ՎԱԶ-2107 մակնիշի մեքենայով դուրս է եկել երթևեկելի գոտուց, գլխիվայր շրջվելով՝ հայտնվել դաշտամիջյան հատվածում: Կարճիկյանը տեղում մահացել է: Պատահարի պատճառը խոշոր եղջերավոր անասուններն են եղել: Վարորդը փորձել է խույս տալ եւ չհարվածել կենդանիներին, սակայն չի կարողացել կառավարել մեքենան: Սամվել Կարճիկյանը աշխատում էր Գեղարքունիքի զորամասերից մեկում: Զինծառայողը մարզի Տորֆավան գյուղից էր, 4 անչափահաս երեխա ունի:
Երեւանը պատած խիտ մառախուղը խաթարել է «Զվարթնոց» միջազգային օդանավակայանի աշխատանքը: Վատ եղանակը ազդել է ինչպես ժամանող, այնպես էլ Երեւանից իրականացվող թռիչքների ժամանակացույցի վրա: Տարբեր ուղղություններով բազմաթիվ թռիչքներ են հետաձգվել դեպի եվրոպական, ռուսական եւ ամերիկյան քաղաքներ:
Դոլարի անկումը շարունակվում է, եվրոն թանկացել է եւս 1.5 դրամով: Դոլարի փոխարժեքը դեկտեմբերի 21-ին կազմել է 481 դրամ, եվրոյինը՝ 571, ռուբլունը՝ 8 դրամ 22 լումա, ֆունտինը՝ 643 դրամ:
Դեկտեմբերի 22-ի ցերեկն ու 23-24-ը հանրապետության շրջանների մեծ մասում տեղումներ են սպասվում: Օդի ջերմաստիճանն էապես չի փոխվի: Երեւանում նույնպես ժամանակ առ ժամանակ տեղումներ կլինեն: Մայրաքաղաքում գիշերը կդիտվի +1+3, ցերեկը՝ +8+10 աստիճան տաքություն:
