Թուրքիան հազիվ թե դուրս բերի իր զորքերը Սիրիայի հյուսիսային տարածքներից: Այս մասին NEWS.am-ի թղթակցի հետ զրույցում նշեց Ռուսաստանի Քաղաքական եւ ռազմական վերլուծության ինստիտուտի ռազմական կանխատեսման կենտրոնի ղեկավար Անատոլի Ցիգանոկը՝ պատասխանելով հարցին՝ կամրապնդի՞ արդյոք Անկարան իր դիրքերը Սիրիայի հյուսիսային շրջաններում, որտեղ գերակշռում է քրդական բնակչությունը:
Միեւնույն ժամանակ փորձագետը ընդգծեց, որ Մոսկվան եւ Թեհրանը, աջակցելով Բաշար Ասադին, կարողացել են հասնել իրենց նպատակներին: «Սակայն թուրքերն առնվազն 20 կիլոմետր տարածք են վերահսկում Սիրիայի հյուսիսում: Սա շատ բանի մասին է խոսում: Ցավոք, ո՛չ Թուրքիան, ո՛չ Սիրիան, ո՛չ էլ Իրանը երբեք չեն ցանկանա թույլ տալ քրդերին սեփական պետություն ստեղծել»,- բացատրեց Ցիգանոկը` հավելելով, որ Անկարան, չնայած այս հաջողությանը, չկարողացավ հասնել իր նպատակների իրականացմանը:
Ինչպես նշեց ռազմական փորձագետը, Թուրքիան կտրականապես դեմ է ամերիկացիների կողմից օգնությանը Սիրիայի հյուսիսում գտնվող քրդերին, եւ դա է, ըստ երեւույթին, նրանց ներխուժման հիմնական պատճառը:
