Կատալոնիայի կառավարության նախկին ղեկավար Կառլես Պուչդեմոնն ինքնավար հանրության խորհրդարանի խոսնակ Ռոժե Տորրենին խնդրել է պաշտպանել իրեն՝ հունվարի 30-ին կայանալիք խորհրդարանի նիստին անարգել ներկայանալու համար, որին կքննարկվի վերջինիս թեկնածությունը կառավարության ղեկավարի պաշտոնում: Այս մասին հաղորդում է «ՌԻԱ Նովոստի»-ն:
Իր ուղերձում Պուչդեմոնը նշում է, որ «իրավունք ունի ներկա գտնվել բանավեճերին եւ քվեարկություններին», եւ Կատալոնիայի կանոնադրության եւ խորհրդարանի կանոնակարգի համաձայն՝ նա իմունիտետի իրավունք ունի, ինչը խոչընդոտում է իր ձերբակալմանը, եթե խոսքը, իհարկե, ակնհայտ հանցագործության մասին չէ:
«Ես խնդրում եմ Ձեզ պաշտպանել ինձ եւ անհրաժեշտ միջոցներ ձեռնարկել խորհրդարանի եւ դրա բոլոր անդամների իրավունքների ապահովման համար», - նշվում է նամակում:
