«Պետական կառավարման համակարգի մարմինների մասին» օրենքի նախագիծը սահմանում է, թե գործադիր իշխանության կառուցվածքում որ մարմինները ում են ենթարկվելու:
Այսօր՝ փետրվարի 1-ին, կառավարության նիստից հետո ներկայացնելով օրենքի նախագիծը, Արդարադատության նախարար Դավիթ Հարությունյանը նշեց. «Սահմանադրությունը ենթադրում է, որ գործադիր իշխանությունն ունի հետեւյալ կառուցվածքը. կան նախարարություններ, կան նախարարություններին ենթակա մարմիններ, վարչապետին ենթակա մարմիններ եւ նախարարներին ենթակա մարմիններ: Մենք հստակ սահմանել ենք, թե որ մարմիններն են ենթակա նախարարություններին, վարչապետին եւ նախարարներին»:
Նա նշեց, որ այժմ իշխանությունը գնում է դեպի անձնական քաղաքական պատասխանատվության ինստիտուտի ամրապնդում. «Բայց որոշակի մարմիններ ունեն սպեցիֆիկա, օրինակ տեսչական մարմինները: Մենք փորձում ենք կրճատել տեսչական մարմինները, որի նպատակն է ունենալ 6 տեսչական մարմիններ, որոնք ծառայելու են ողջ կառավարության առջեւ դրված խնդիրներին, չեն վերաբերում կոնկրետ նախարարությունների, հետեւաբար, պատասխանատվությունը պետք է լինի կոլեկտիվ, ոչ թե անձնական»,-ասաց նախարարը:
Ինչ վերաբերում է վարչապետին ենթակա մարմիններին, նա ասաց, որ դրանք թվով 4-ն են՝ ԱԱԾ-ն, ոստիկանությունը, վարչապետի վերահսկողական ծառայությունը եւ պետական պահպանության ծառայությունը: