«Յուկոս»-ի նախկին սեփականատեր Միխայիլ Խոդորկովսկին հայտարարել է, որ շահագրգռված չէ նախագահի պաշտոնումՎլադիմիր Պուտինի փոխելու հարցում:
Associated Press-ին տված հարցազրույցում Խոդորկովսկին հայտարարել է, որ Ռուսաստանի դեմ ԱՄՆ-ի եւ ԵՄ-ի քաղաքական պատժամիջոցները չեն աշխատում եւ զգուշացրել է, որ ԱՄՆ-ի հետ Պուտինի հարաբերությունները մոտ ապագայում դժվար թե բարելավեն:
Նրա խոսքով՝ այն ինչ նա իսկապես ցանկանում է Ռուսաստանի համար՝ նոր քաղաքական համակարգն է: «Ցավոք, ոչ ոք, ով ցանկանում է գալ եւ փոխարինել Պուտինին, ելք չեն», - ասել է նա՝ փոխարենը խոսելով խորհրդարանական ժողովրդավարության աստիճանական բարեփոխումների մասին:
Նա նշել է, որ մարտի 18-ին Ռուսաստանում կայանալիք նախագահական ընտրությունները «ընտրություններ չեն», քանի որ բոլորը գիտեն արդյունքը: Այնուամենայնիվ, նա կոչ է արել մարդկանց դուրս գալ տանից եւ քվեարկել:
Խոդորկովսկին ակնարկել է, որ ինքը հակված է Քսենիա Սոբչակի թեկնածությանը աջակցել, սակայն նրան հորդորել է առաջին հերթին պարզաբանել իր դիրքորոշումները: Խոդորկովսկին ասել է. «Ես չգիտեմ` կքվեարկեմ նրա օգտին կամ կջնջեմ բոլոր անունները եւ կգրեմ. «Ես զզվում եմ Պուտինից»,-ասել է Խոդորկովսկին:
Խոդորկովկսին սակայն լուծում չի համարում նաեւ ընդդիմադիր Ալեքսեյ Նավալնիին՝ նրան մեղադրելով «լավ ասպետ» դառնալու փորձի մեջ՝ Ռուսաստանի քաղաքական համակարգը բարեփոխելու փոխարեն:
Նրա խոսքով՝ Պուտինի հաջորդ պաշտոնավարումը Ռուսաստանին կբերի նոր անկում եւ ավելի լարված հարաբերություններ Միացյալ Նահանգների հետ: Խոդորկովսկին նաեւ նշել է, որ Ռուսաստանի հանդեպ պատժամիջոցները չեն գործում, քանի որ նրանք միայն նպաստում են Պուտինի այն փաստարկին, որ ռուսների խնդիրները կապված են Արեւմուտքի հետ:
Նշենք, որ Խոդորկովսկին ապրում է ՌԴ սահմաններից դուրս այն ժամանակվանից, երբ 2013-ի դեկտեմբերին բանտից վաղաժամկետ ազատ էր արձակվել: