Ռուսաստանի Լիբերալ-դեմոկրատական կուսակցության (ՌԼԴԿ) առաջնորդ, ՌԴ նախագահի թեկնածու Վլադիմիր Ժիրինովսկին մտադիր է պահանջել Կենտրոնական ընտրական հանձնաժողովի նախագահ Էլլա Պամֆիլովայի հրաժարականը:
Ժիրինովսկիի գլխավոր դժգոհությունը Կենտրոնական ընտրական հանձնաժողովի գործունեությունից կապված է նախագահական ընտրությունների նախաշեմին բանավեճերի կազմակերպման հետ: Ըստ վերջինիս՝ ՌԼԴԿ-ն ԿԸՀ-ին առաջարկել է թեկնածուներին երեք խմբի բաժանել. առաջին խմբին տալ Առաջին ալիքը, երկրորդին՝ «Ռոսիա 1»-ի եթերը, երրորդին` «ՏՎ Ցենտր»-ը, իսկ ռադիոյից ընդհանրապես հրաժարվել կամ թողնել վստահված անձանց: «Սակայն մեզ չընդառաջեցին»,- «ՏԱՍՍ»-ի մամուլի ասուլիսի ժամանակ ասել է Ժիրինովսկին:
«Այսպիսի ԿԸՀ-ը մեզ, իհարկե, հարկավոր չէ: Մենք կպահանջենք փոխել ղեկավարությանը»,- ասել է քաղաքական գործիչը: Ժիրինովսկին նշել է, որ ՌԼԴԿ-ն կարող է առաջարկել Կենտրոնական ընտրական հանձնաժողովի ղեկավար նշանակել Լիբերալ-դեմոկրատական խմբակցության նախկին պատգամավոր, Ռուսաստանի ԿԸՀ-ի անդամ Սերգեյ Սիրոտկինին: «Մեզ մոտ կա Սիրոտկինըն, իսկ եթե նա ԿԸՀ-ի բոլոր նիստերին արժանի կերպով ինձ չպաշտպանի, մենք կփոխարինենք նաեւ նրան»,- հավելել է ՌԼԴԿ-ի առաջնորդը:
Հիշեցնենք, որ Ռուսաստանի Դաշնությունում նախագահական ընտրությունները կկայանան մարտի 18-ին:
