ՌԴ նախագահի մամուլի խոսնակ Դմիտրի Պեսկովը հրաժարվել է մեկնաբանել մի շարք ռուսական լրատվամիջոցների հեռանալը Պետդումայից՝ ի նշան Սլուցկիի հարցով էթիկայի հանձնաժողովի որոշման դեմ բոյկոտի՝ նշելով, որ դա երկրի նախագահի վարչակազմի խնդիրը չէ, գրում է «ՌԻԱ Նովոստի»–ն։
Նա նաեւ հրաժարվել է մեկնաբանել Էթիկայի հանձնաժողովի որոշումը։
Նշենք, որ մարտի 21-ին Պետդումայի էթիկայի հարցերով հանձնաժողովը Սլուցկիի գործողություններում ոչ մի խախտում չի գտել: Հանձնաժողովի նիստում BBC-ի ռուսական ծառայության թղթակից Ֆարիդա Ռուստամովան եւ «Դոժդի» պրոդյուսեր Դարյա Ժուկը պատմել են, թե Սլուցկին ինչպես է իրենց հետապնդել: Ի պատասխան հանձնաժողովի անդամները սկսել են հարցնել, ինչու են այդ ոտնձգությունների մասին մտաբերել միայն նախագահական ընտրությունների նախաշեմին:
Հանձնաժողովի որոշումից հետո ՌԲԿ-ն հայտարարել է, որ իր թղթակիցներին Պետդումայից հետ է կանչում, նույն կերպ է վարվել «Դոժդ» հեռուստաալիքը: «Կոմերսանտ» պարբերականը որոշել է, որ չի համագործակցի Սլուցկիի եւ էթիկայի հանձնաժողովի հետ ի համերաշխություն լրագրողների: «Լենտա.ռու»-ն խոստացել է հեռացնել Սլուցկիի հետ կապված բոլոր նյութերը:
«Էխո Մոսկվիի» գլխավոր խմբագիր Ալեքսեյ Վենեդիկտովը հայտարարել է, որ իր աշխատակիցներին Պետդումայից հետ է կանչում, քանի որ այն լրագրողների աշխատանքի համար «վտանգավոր վայր» է դարձել:
