Նորընտիր նախագահը երդվեց եւ ստանձնեց պաշտոնը, հիմա էլ հերթը վարչապետի ընտրությանն է: Խորհրդարանի խոսնակն այսօր մեկնարկած քառօրյա նիստում հայտարարել է, որ ընտրությունը տեղի կունենա ապրիլի 17-ին:
Երեկ ՀՀԿ առաջին փոխնախագահ Կարեն Կարապետյանը հայտարարել էր, որ վարչապետի պաշտոնում իշխող կուսակցությունն առաջադրելու է Սերժ Սարգսյանի թեկնածությունը: Էդուարդ Շարմազանովն այսօր հաստատել է սա, միաժամանակ հորդորել պաշտոնական հայտարարության համար սպասել Հանրապետականի վաղվա նիստին: Ինչ վերաբերում է տեսակետին, թե Հանրապետականն օգտագործեց Կարեն Կարապետյանին, իսկ հիմա զրկում է վարչապետի պաշտոնում պաշտոնավարելու հետագա հնարավորությունից. Շարմազանովը խորհուրդ է տալիս, իր բնորոշմամբ, մատի ու մատանու արանքը չմտնել: Նա, միաժամանակ, չի հերքել. նոր կառավարությունում Կարեն Կարապետյանը, ըստ ամենայնի, կնշանակվի առաջին փոխվարչապետի պաշտոնում:
Իսկ Ազգային ժողովի նիստում Հայաստան-Եվրամիություն համաձայնագրի քննարկման ժամանակ մտահոգություններ են հնչել՝ կապված ատոմակայանի հնարավոր փակման հետ: Միքայել Մելքումյանն առաջարկում է եվրոպացիների առջեւ պայման դնել. եթե նոր ռեակտոր չի կառուցվում, ՀԱԷԿ-ի ապագործարկման հարցը փակվում է: ԱԳ փոխնախարարը, սակայն, վստահեցնում է, որ ատոմակայանի փակման մասին Եվրամիության հետ ստորագրված փաստաթղթում որեւէ ձեւակերպում չկա:
«Ծառուկյան» խմբակցությունը կողմ կքվեարկի համաձայնագրի վավերացմանը, սակայն Նաիրա Զոհրաբյանը կարծում է, որ դրա իրականացման համար իշխանությունը ստիպված կլինի կոտրել սեփական ողնաշարը: Իսկ եթե բարեփոխումները ոչ թե իրական լինեն, այլ իմիտացիա, այս փաստաթուղթն էլ թղթի վրա կմնա:
Ինչ վերաբերում է վիզաների ազատականացմանը. փոխարտգործնախարար Կարեն Նազարյանը հույս ունի, որ մոտ ժամանակներս գործընթացը կմեկնարկի: Համենայն դեպս՝ դրա համար անհրաժեշտ քայլեր արդեն արել ենք:
«Իմ քայլը» նախաձեռնության մասնակիցներն արշավի 11-րդ օրը Հրազդան են հասել: Նիկոլ Փաշինյանը գոհ է քայլարշավի ընթացքից, իսկ արդյունքին սպասում է Ազատության հրապարակում: Մինչ այդ, երեկ «Քաղաքացիական պայմանագիր» կուսակցության երկու անդամներ՝ Վարսենիկ Ուզունյանն ու Բաբկեն Գրիգորյանը բերման են ենթարկվել ոստիկանություն: Կուսակցությունից տեղեկացնում են, որ նրանց բերման են ենթարկել Երեւանի կենտրոնում իրազեկման աշխատանքներ կատարելիս: Ուզունյանին եւ Գրիգորյանին վարչական իրավախախտման մեղադրանք են առաջադրել, իսկ ավելի ուշ ազատ արձակել:
Ոստիկանությունն իր հերթին հայտարարություն է տարածել՝ նշելով, որ այս օրերին Երեւանում օրենքի խախտմամբ հավաքներ եւ երթեր են անցկացվում. դրանք բազմամարդ են լինում, սահմանված կարգով հավաքների մասին չեն տեղեկացնում համայնքների ղեկավարներին, փողոցներ են փակվում: Իրավապահները զգուշացրել են, որ ցանկացած խախտման իրավական գնահատական է տրվելու:
Ամերիկյան նոր պատժամիջոցների արդյունքում Ռուսաստանի ամենահարուստ մարդիկ, ընդհանուր առմամբ, շուրջ 16 միլիարդ դոլար են կորցրել: Վնասներ են կրել, մասնավորապես, Bloomberg-ի միլիարդատերերի ցանկում հայտնված 27 ռուսաստանցիներից 26-ը: Ապրիլի 6-ին Վաշինգտոնը պատժամիջոցներ սահմանեց Ռուսաստանից 38 ֆիզիկական եւ իրավաբանական անձանց նկատմամբ: Դրանից հաշված օրեր անց՝ ապրիլի 9-ից Մոսկվայի բորսայի ինդեքսը 2014 թվականի մարտից ի վեր ամենամեծ վնասները կրեց: Ապրիլի 10-ի դրությամբ Ռուսաստանում դոլարի փոխարժեքը գերազանցել է 63 ռուբլին, իսկ եվրոյինը հասել է 78 ռուբլու: Կարծիք է հնչում, որ նոր պատժամիջոցները կարող են հանգեցնել տեխնիկական դեֆոլտների: Միաժամանակ, Մոսկվան Վաշինգտոնի սահմանած նոր պատժամիջոցներն անընդունելի եւ անօրինական է որակել՝ հայտարարելով, որ իրեն իրավունք է վերապահում նույն կերպ պատասխանել: Պուտինի վարչակազմի պաշտոնյաները նաեւ հայտնել են, որ արդեն գնահատել են ռուսաստանյան ընկերությունների կրած վնասն ու պետական աջակցություն խոստացել պատժամիջոցների արդյունքում տուժած ընկերություններին:
Վորոնեժում մարտի 20-ին վթարված հայկական ավտոբուսի վարորդը կալանավորվել է: «ՄԱՆ-ՏՈՒՐ» ընկերությունից, որին պատկանում էր վթարված ավտոբուսը, տեղեկացնում են, որ հարուցված քրեական գործով նախաքննություն է ընթանում: Ավտոբուսի մյուս վարորդը, որը մարմնական վնասվածքներ էր ստացել, ապաքինվել է. նա արդեն Երեւանում է: Նշենք, որ վթարից հետո ռուսական կողմը հայտարարել էր, թե նախնական տվյալներով՝ վթարի պատճառն ավտոբուսն է, որը դուրս է եկել հանդիպակաց գոտի: Հայկական ընկերությունն իր հերթին պատահարի մեղավոր է համարում բեռնատարի վարորդին: Հիշեցնենք, որ Երեւան-Մոսկվա երթուղու ավտոբուսի եւ բեռնատարի բախման հետեւանքով 2 մարդ է զոհվել:
Վարդան Մինասյանը նորից կգլխավորի ֆուտբոլի Հայաստանի ազգային հավաքականը: Ֆուտբոլի ֆեդերացիայի գործկոմի նիստում գլխավոր մարզչի պաշտոնում նրա թեկնածությունն առաջադրել է Ռուբեն Հայրապետյանը, իսկ կոմիտեի բոլոր անդամները կողմ են արտահայտվել: Վարդան Մինասյանը Հայաստանի հավաքականը գլխավորել է նաեւ 2009-2013 թվականներին: Մարզչական կարիերայի ընթացքում նա աշխատել է նաեւ «Փյունիկում» եւ ղազախական «Ակտոբեում», իսկ վերջին շրջանում զբաղեցնում է ՀՖՖ տեխնիկական տնօրենի պաշտոնը: Հիշեցնենք, որ հավաքականի նախկին գլխավոր մարզիչ Արթուր Պետրոսյանը հրաժարական էր ներկայացրել ապրիլի 6-ին: Այսօր նաեւ Երիտասարդական հավաքականի գլխավոր մարզիչ է նշանակվել. այդ պաշտոնը կզբաղեցնի Երեւանի «Փյունիկը» գլխավորող Արմեն Գյուլբուդաղյանցը:
Grenke Chess Classic մրցաշարի հաղթողի կոչումը նվաճեց աշխարհի չեմպիոնի հավակնորդ, ամերիկացի Ֆաբիանո Կարուանան: Նա միանձնյա առաջին տեղը գրավեց 6.5 միավորով: 5.5 միավորով երկրորդ տեղում աշխարհի չեմպիոն, նորվեգացի Մագնուս Կարլսենն է, իսկ 5-ական միավորով 3-5-րդ հորիզոնականները բաժանում են հայկական շախմատի առաջատար Լեւոն Արոնյանը, ֆրանսիացի Մաքսիմ Վաշյե-Լագրավն ու ռուսաստանցի Նիկիտա Վիտյուգովը: Հիշեցնենք, որ Լեւոն Արոնյանը Grenke Сhess Сlassic-ի անցած տարվա հաղթողն է. նա նույնպես մրցաշարի միանձնյա առաջատար էր դարձել 5.5 միավորով: Իսկ այս տարվա մրցաշարը հայ գրոսմայստերն անցկացրեց առանց պարտության. նա հաղթեց Ադրբեջանը ներկայացնող Արկադի Նայդիչին, իսկ մյուս պարտիաներն ավարտեց ոչ ոքի:
Ապրիլի 10-ին դոլարն ու եվրոն թանկացել են, ռուբլին՝ կտրուկ էժանացել: Դոլարի փոխարժեքն այսօր կազմել է 481 դրամ, եվրոյինը՝ 593, ռուբլունը՝ 7 դրամ 71 լումա, ֆունտինը՝ 682 դրամ:
Ապրիլի 11-14-ին երեկոյան ժամերին հանրապետությունում սպասվում է կարճատեւ անձրեւ եւ ամպրոպ: Օդի ջերմաստիճանն էապես չի փոխվի: Երեւանում նույնպես վաղը երեկոյան հնարավոր են կարճատեւ տեղումներ: Մայրաքաղաքում գիշերը կդիտվի +10+12, ցերեկը՝ +24+26 աստիճան տաքություն: