Տավուշի մարզում՝ Բաղանիս համայնքի մոտակայքում, ադրբեջանական զինուժը կրակ է բացել հայկական քաղաքացիական բեռնատարի ուղղությամբ: Մեքենան վնասվել է, իսկ վարորդը, բարեբախտաբար, չի տուժել: Պաշտպանության նախարարի մամուլի խոսնակի տեղեկացմամբ՝ հայկական ստորաբաժանումները պատասխան կրակ են բացել, ինչից հետո հակառակորդը լռել է:
Արտակարգ դեպք Տավուշում. Այգեձորի հանդամասում ականի պայթյունից 3 քաղաքացիներ են տուժել: Վիրավորները՝ 36-ամյա Նվերը, 32-ամյա Աստղիկն ու 37-ամյա Արամը, Այգեձորի բնակիչներ են: Նրանց Բերդի հոսպիտալում վիրահատել են. անդամահատել են տղամարդկանցից մեկի եւ կնոջ ոտքը, իսկ մյուս տղամարդու՝ ձեռքը: Բժիշկները տուժածների վիճակը բավարար են գնահատում:
Հավելենք, որ տուժածներից երկուսն ամուսիններն են: Նրանք գնացել են սինդրիկ հավաքելու, սակայն կորցրել են կողմնորոշումն ու մտել ականապատ տարածք: Ականի պայթյունից տուժած ամուսիններին օգնության են հասել համագյուղացիները, այդ ժամանակ էլ նրանցից մեկը նույնպես վիրավորվել է:
Ազատության հրապարակում այսօր մեկնարկել է «Քաղաքացիական պայմանագիր» կուսակցության նախաձեռնած հանրահավաքը՝ ընդդեմ Սերժ Սարգսյանի վարչապետության: Նշենք, որ կուսակցության քաղխորհրդի անդամ Նիկոլ Փաշինյանն իր կողմնակիցների հետ Գյումրիից քայլելով հասել է Երեւան. քայլարշավի մասնակիցները 214 կմ ճանապարհ են անցել: Այսօր առավոտյան էլ նրանց են միացել դասադուլ հայտարարած մի խումբ ուսանողներ:
Ակցիայի մասնակիցները գնացել են ԵՊՀ եւ ռեկտորի հետ հանդիպում պահանջել: Արամ Սիմոնյանը, սակայն, չի արձագանքել: Համալսարանից արդեն նրանք շարժվել են դեպի Ազատության հրապարակ՝ ճանապարհին շարունակելով քաղաքացիներին կոչ անել միանալ իրենց: Հրապարակում ավելի քան մեկ ժամ տեւած հանրահավաքին երթ է հաջորդել: Նիկոլ Փաշինյանը հայտարարել է, որ գնում են Ֆրանսիայի հրապարակը գրավելու: Րոպեներ անց ոստիկանները կանգնեցրել են երթի մասնակիցներին, իսկ Երեւանի փոխոստիկանապետ Վալերի Օսիպյանը Նիկոլ Փաշինյանին հայտնել է, որ փողոցների փակումը հակաօրինական եւ կարող է հետեւանքներ առաջացնել։ Չնայած սրան՝ ցուցարարները կաթվածահար են արել Մաշտոցի պողոտայի երթեւեկությունը: Հավելենք նաեւ, որ Փաշինյանի նախաձեռնած պայքարի մասնակիցներն ավելի վաղ հայտարարել են, որ մտադիր են ապրիլի 17-ին, երբ խորհրդարանի հատուկ նիստում կայանալու է Հայաստանի վարչապետի ընտրությունը, շրջափակել ԱԺ շենքն ու պատգամավորների տները, որպեսզի նրանց թույլ չտան մասնակցել վարչապետի ընտրությանը: «Ելք» դաշինքի մյուս երկու՝ «Լուսավոր Հայաստան» եւ «Հանրապետություն» կուսակցությունները, ի դեպ, չեն միացել այս պայքարին:
Անկարայի դատախազությունը պահանջում է անձեռնմխելիությունից զրկել Կարո Փայլանին: Հայազգի պատգամավորը մանդատ է ստացել քրդական «Ժողովուրդների դեմոկրատական» կուսակցության ցուցակով: Թուրքիայի Արդարադատության նախարարությանը քրդական կուսակցության եւս 7 պատգամավորի անձեռնմխելիությունից զրկելու պահանջ է ներկայացվել: Անկարայի դատախազությունը նրանց մեղադրում է թուրք ազգին, Թուրքիայի նախագահին վիրավորելու եւ «ահաբեկչական կառույցի օգտին քարոզչություն անելու» մեջ: Եթե նախարարությունը մեղադրանքներն արդարացի համարի, պատգամավորներին անձեռնմխելությունից զրկելու պահանջը կփոխանցվի խորհրդարանի նախագահին:
Արարատում ողբերգական վթար է տեղի ունեցել: Առավոտյան Երեւան-Երասխ ավտոճանապարհին BMW մակնիշի մեքենան դուրս է եկել ճանապարհի երթեւեկելի գոտուց եւ բախվել ճանապարհի բաժանարար երկաթբետոնե արգելապատնեշին: Վթարի հետեւանքով 2 մարդ տեղում մահացել է, մեկը՝ հիվանդանոց տեղափոխվել: Պատահարի զոհ են դարձել մեքենայի վարորդը՝ Արտաշատի 34-ամյա բնակիչ Արման Հախնազարյանը եւ ուղեւորներից Երեւանի 36-ամյա բնակիչ Լուսինե Պողոսյանը: Վիրավորը Երեւանի 27-ամյա բնակիչ Արմենուհի Սարգսյանն է: Նրա վիճակը ծայրահեղ ծանր է:
Շվեյցարական Նիոնում տեղի է ունեցել ֆուտբոլի եվրոպական Չեմպիոնների լիգայի կիսաեզրափակիչի վիճակահանությունը: Մրցաշարի գործող գավաթակիր Մադրիդի «Ռեալին» բաժին է հասել Մյունխենի «Բավարիան»: Եզրափակիչի մյուս ուղեգիրը կվիճարկեն անգլիական «Լիվերպուլն» ու իտալական «Ռոման»: Չեմպիոնների լիգայի կիսաեզրափակիչի առաջին հանդիպումները ապրիլի 24-ին եւ 25-ին են, պատասխան խաղերը՝ մայիսի 1-ին եւ 2-ին։ Իսկ եզրափակիչը տեղի կունենա մայիսի 26-ին Կիեւում:
Իսկ Եվրոպայի լիգայի կիսաեզրափակիչում Լոնդոնի «Արսենալը», որտեղ հանդես է գալիս Հենրիխ Մխիթարյանը, կմրցի Մադրիդի «Աթլետիկոյի» հետ: Կիսաեզրափակիչի մյուս զույգն ավստրիական «Զալցբուրգը» եւ ֆրանսիական «Մարսելն» են: Եվրոպայի լիգայի կիսաեզրափակիչի առաջին հանդիպումներն էլ կկայանան ապրիլի 26-ին, իսկ պատասխան խաղերը՝ մայիսի 3-ին: Եզրափակիչը կանցկացվի մայիսի 16-ին Լիոնում:
Ապրիլի 13-ին դոլարը սկսել է թուլանալ, էժանացել է նաեւ եվրոն: Դոլարի փոխարժեքը կազմել է 482 դրամ, եվրոյինը՝ 595, ռուբլունը՝ 7 դրամ 85 լումա, ֆունտինը՝ 689 դրամ:
Ապրիլի 14-ին հանրապետության շրջանների զգալի մասում սպասվում է անձրեւ եւ ամպրոպ: Օդի ջերմաստիճանը 14-15-ին 6-7 աստիճանով կնվազի, այնուհետեւ նույնքան կբարձրանա: Երեւանում նույնպես վաղը տեղումներ են սպասվում: Մայրաքաղաքում գիշերը կդիտվի +9+11, ցերեկը՝ +19+21 աստիճան տաքություն: