Ամերիկայի Հայ Դատի հանձնախմբի ներկայացուցիչները եւ առողջապահության ոլորտի փորձագետ Ալինա Դորյանը հանդիպումներ են ունեցել ԱՄՆ Պետդեպարտամենտի եւ Միջազգային զարգացման գործակալության պաշտոնյաների հետ:
Հանդիպումների ընթացքում քննարկվել է ԱՄՆ-ի ուղղակի օգնությունը Արցախի ամենախոցելի բնակիչների համար, ինչպես նաեւ ականազերծման ջանքերին օժանդակությունը: Անդրադարձ է եղել նաեւ առեւտրի հարցերին, Հայոց ցեղասպանության հիշատակին նվիրված միջոցառումներին, Հայաստանում իրավիճակին եւ այլ խնդիրներին:
«Կոնգրեսից HALO Trust-ի համար բավականաչափ ֆինանսավորմամբ մենք շուտով հասնելու ենք նրան, որ Արցախը կմաքրվի ականներից, եւ այսօր մենք հնարավորություն ունենք Արցախի առավել խոցելի բնակիչների՝ երեխաների, մեծահասակների, տարեցների եւ հաշմանդամների համար վերականգնողական ծառայությունները զգալիորեն ընդլայնելու համար: Արցախում ԱՄՆ-ի օգնության իմաստն ու սիմվոլիզմը խաղաղ կյանքի համար ներդրումն է, եւ մենք թույլ չենք տա Բաքվին արգելափակել այդ ջանքերը», - ասել է Ամերիկայի Հայ Դատի հանձնախմբի գործադիր տնօրեն Արամ Ամբարյանը:
