Հայաստանի քաղաքացին եւ հայ ժողովուրդը այլեւս երբեք չի պարտվելու, եւ հաղթանակը լինելու է մեր ժողովրդի մշտական ուղեկիցը։ Այդ մասին Գյումրիում ընթացող հանրահավաքում ասել է ընդդիմադիր շարժման առաջնորդ, ԱԺ պատգամավոր Նիկոլ Փաշինյանը։
«Որեւէ կասկած չկա, որ հզոր ժողովուրդը հաղթելու է ղարաբաղյան հակամարտությունը, հաղթելուէ կոռուպցիային, աղքատությանը, հզոր հաղթանակներ է տանելու տնտեսության բնագավառում, որ հզոր այս ժողովուրդը դադարեցնելու է դեպի արտերկիր իր քայլարշավը եւ սկսելու է մի մեծ երթ աշխարհի բոլոր անկյուններից դեպի իր անզուգական հայրենիքը»,- ասել է Փաշինյանը։
Նրա խոսքով, շատերը փորձում են օրվա օրակարգը ներկայացնել պրիմիտիվացված ձեւով։ «Շատերին թվում է, թե հարցն այն մասին է, թե ով կզբաղեցնի վարչապետի աթոռը։ Այդպես մտածողները չեն հասկանում ՀՀ-ում տեղի ունեցող իրադարձությունները։ Այսօր Հայաստանի քաղաքացին ուղղել է իր մեջքը, ամուր կանգնած է ոտքերի վրա, նա վստահ հայացքով նայում է ապագային։ Այսօր ՀՀ քաղաքացիության ինստիտուտը հաղթանակել է։ Այսօր կա մի ճանապարհ՝ ժողովրդի թեկնածուին ՀՀ վարչապետ ընտրելն է։ Եթե ես իմանամ, որ կա որեւէ այլ ճանապարհ, որ չի ջարդելու, չի կոտրելու ՀՀ քաղաքացու հաղթանակը եւ հաղթանակի զգացողությունը, եւ նույն պահին կհրաժարվեմ։ Բայց քաղաքական պատասխանատվությունը ինձ ստիպում է արձանագրել, չկա ուրիշ տարբերակ եւ նրա դե-ֆակտո հաղթանակը պետք է արձանագրվի դե-յուրե մայիսի 1-ին»- նշել է Փաշինյանը։
Նշենք, որ նախօրեին Փաշինյանը հանրահավաքում հայտարարեց, որ ապրիլի 27-ին, ժամը 18.00-ին հանրահավաք են անելու Գյումրիի Վարդանանց հրապարակում. դեպի Գյումրի ավտոերթը կշարժվի ուղիղ ժամը 15.00-ին՝ Աշտարակի խճուղու սկզբնամասից՝ 15-րդ թաղամասի եւ ՊՆ նախկին շենքի միջեւ ընկած հատվածից:
Բացի այդ, ապրիլի 28-ին, ժամը 15.00-ին հանրահավաք է տեղի ունենալու Վանաձորի Արցախ պուրակում. դեպի Վանաձոր ավտոերթը կշարժվի ապրիլի 28-ին, ժամը 12.00-ին Ավանի Հարսնաքարի դիմացի հատվածից: