Ուժեղ ընդդիմությունը նշանակում է ուժեղ պետություն։ Այս մասին հայտնել է արդարադատության նախարարի պաշտոնակատար Դավիթ Հարությունյանը օտարերկրյա լրագրողների հետ ապրիլի 28-ին կայացած ճեպազրույցի ժամանակ։
Նրա խոսքով՝ իշխանության մենաշնորհումը եւ ուժեղացող ընդդիմության դերի թերագնահատումը դարձան ՀՀԿ-ի գլխավոր սխալները։ «Կարծում եմ՝ մեր՝ ՀՀԿ-ի հիմնական խնդիրը մեկ քաղաքական կուսակցության կողմից քաղաքական իշխանության մենաշնորհման վտանգը չգիտակցելն էր»,-ասել է Հարությունյանը։ «Դա մեր հիմնական սխալն էր, որը մենք խոստովանում ենք»,-հավելել է նա, փոխանցում է ՏԱՍՍ-ը։
Նրա համոզմամբ՝ հենց իշխանության մենաշնորհումն էլ դարձավ բողոքի ցույցերի պատճառ։ Հարությունյանը կոչ է արել չկրկնել անցյալի սխալները․ «Մենք չեն կարող մի մենաշնորհից մյուսն անցնել։ Գործընթացը քաղաքական տեսանկյունից հնարավորինս ինքլյուզիվ պիտի լինի, եւ մենք հասկանում ենք, որ սա միակ միջոցն է առաջ շարժվելու համար»,-պարզաբանել է նա։
Իր հերթին Ազգային ժողովի փոխխոսնակ Արփինե Հովհաննիսյանը հավելել է, որ իշխանությունը հավանություն չի տալիս ՀՀԿ-ին քաղաքական գործընթացից բացառելու փորձերին։ «Յուրաքանչյուր կուսակցություն պետք է հավասար հնարավորություններ ունենա բանակցություններում: Մենք տեսանք, որ միակողմանի վերջնագիր կար: Եվ կառավարությունում բացատրել են, թե ինչու չեն պատրաստվում քննարկել թեմաները միայն մեկ կողմի հետ»,-շեշտել է նա։