Մենք ամբողջ թիմով կքննարկենք, ու մինչեւ քվեարկությունը ՀՀԿ խմբակցության ղեկավարը կհայտարարի խմբակցության որոշումը: Այս մասին, այսօր՝ ԱԺ-ում ՀՀԿ նիստում վարչապետի թեկնածու Նիկոլ Փաշինյանի հետ հանդիպումից հետո լրագրողների հետ զրույցում ասաց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը:
Հարցին, թե ՀՀԿ-ն միասնակա՞ն է քվեարկելու, Շարմազանովը պատասխանեց. «Ես առաջ չընկնեմ, մենք պայմանավորվել ենք ամբողջությամբ քննարկել եւ գալ վերջնական հայտարարի: Ինչ որոշում էլ կայացնենք, հիմքում կլինի Արցախի ու ՀՀ անվտանգությունը»:
Հիշեցնենք, որ մինչ այդ ԱԺ «Ելք» խմբակցության ղեկավար Նիկոլ Փաշինյանը հանդիպել է «Ելք», «Ծառուկյան» եւ ՀՅԴ խմբակցությունների հետ: Բոլոր այդ խմբակցությունները մայիսի 1-ի ԱԺ հատուկ նիստում պատրաստ են քվեարկել Նիկոլ Փաշինյանի օգտին:
Նշենք, որ եթե ԱԺ-ն չհաստատի կառավարության ծրագիրը, ապա արտահերթ ընտրությունները պետք է տեղի ունենան դրանից ոչ շուտ քան 30 եւ ոչ ուշ քան 45 օր հետո: Իսկ եթե ընտրվում է երրորդ տարբերակը, որ կառավարությունը բերում է ծրագիր եւ դնում իր վստահության հարցը, ապա դա կարող է տեղի ունենալ միայն վարչապետի ընտրությունից մեկ տարի հետո:
Հիշեցնենք, որ վարչապետի ընտրության հարցը ԱԺ-ն քննարկելու է մայիսի 1-ի հատուկ նիստում: ՀՀԿ խմբակցությունն արդեն հայտարարել է, որ վարչապետի թեկնածու չի առաջադրելու: ՀՀԿ խմբակցության ղեկավար Վահրամ Բաղդասարյանը նշել է, որ ՝ եթե խորհրդարանում ներկայացված մյուս 3 քաղաքական ուժերը մեկ թեկնածուով հանդես գան, Հանրապետական խմբակցությունը չի խոչընդոտի, որ մայիսի 1-ին Հայաստանն ունենա վարչապետ։ «Ելք»-ը արդեն թեկնածու է առաջադրել Նիկոլ Փաշինյանի թեկնածությունը: ՀՅԴ-ն առաջարկել է բոլոր խմբակցություններին վարչապետի միասնական թեկնածու առաջադրել Նիկոլ Փաշինյանին, իսկ «Ծառուկյան» դաշինքը որոշել է սատարել «ժողովրդի թեկնածուին»:
Նշենք, որ ԱԺ-ում ՀՀԿ-ն ունի 58 մանդատ, «Ծառուկյան» դաշինքը՝ 31, «Ելք»-ը՝ 9, ՀՅԴ-ն 7 մանդատ: Վարչապետի ընտրության համար անհրաժեշտ է 53 ձայն: