Ես երբեւէ չեմ հանդգնի ասել, որ Ընտրական օրենսգրքում պետք է փոփոխություն տեղի ունենա իմ ուզած տարբերակով: Այս մասին այսօր՝ մայիսի 1-ին ԱԺ հատուկ նիստում, որտեղ քննարկվում է վարչապետի ընտրության հարցը, հայտարարեց վարչապետի թեկնածու, «Ելք» խմբակցության ղեկավար Նիկոլ Փաշինյանը:
«Ընտրական օրենսգիրքը մի փաստաթուղթ է, որը եթե լայն ընկալում չունենա քաղաքական ուժերի եւ ժողովրդի շրջանում, անհնար կլինի կազմակերպել այնպիսի ընտրություններ, որն ուզում ենք: Իսկ մենք ուզում ենք, որ այդ ընտրությունները լինեն անառարկելի»,- ասաց նա:
ՀՀԿ խմբակցության պատգամավոր Շուշան Սարդարյանի հարցին՝ արդյո՞ք կունենա համապատասխան ձայներ եւ կոնսենսուս ԱԺ-ում Ընտրական օրենսգիրքն իր ցանկալի տարբերակով անցկացնելու համար, իսկ դա պահանջում է ԱԺ պատգամավորների թվի 3/5-ի կողմ ձայները, Փաշինյանը պատասխանեց. «Ես հայտարարում եմ, որ ավարտվել է այն ժամանակաշրջանը, երբ կառավարությունն ինչ-որ բան է պարտադրում հանրության որեւէ շերտի: Մեր նպատակն արդար, ազատ ընտրության անցկացումն է: Երկխոսության ժամանակ գուցե Դուք այնպիսի առաջարկ անեք, որն ավելի լավ ապահովի արդար ընտրության անցկացումը: Մենք պատրաստվում ենք այդ հարցը լուծել երկխոսության միջոցով: Պետք է հասկանալ, որ ընտրությունների արդյունքների խեղաթյուրումը բոլորիս է վնաս տալիս»:
Իսկ հարցին, թե որոնք են սահմանադրական այն մեխանիզմները, որոնք հնարավորություն կտան արտահերթ ընտրություններ անցկացնել, Փաշինյանն արձագանքեց. «Մի քանի տարբերակ կա, եւ այդ տարբերակների ընտրությունը կախված է նաեւ քննարկումներից: Տարբերակներից մեկը, օրինակ, հետեւյալն է. կառավարությունը ձեւավորվում է, բայց ԱԺ-ն չի հաստատում կառավարության ծրագիրը երկու անգամ: Այդ պայմաններում իրավունքի ուժով լուծարվում է Ազգային ժողովը: Ես չեմ ասում, որ սա ճիշտ տարբերակ է, սա միայն որպես մի մեխանիզմ է: Սահմանադրությունը սահմանափակել է այդ հնարավորությունը, բայց կա հնարավորություն այս հարցի շուրջ քննարկումների միջոցով հասնել համաձայնության»: