News
Լրահոս
News
Շաբաթ
Օգոստոս 18
Տեսնել լրահոսը


Գյումրիում կրակոցներ են հնչել. 2 քաղաքացի է մահացել: Իրավապահներն արդեն պարզել են զոհվածների ինքնությունը. նրանք են 33-ամյա Վարդան Կարապետյանն ու 37-ամյա Թելման Կարապետյանը: Սպանվածները Գյումրիի բնակիչներ են, հորեղբոր որդիներ: Դեպքի վայրում ինքնաձիգի եւ «Մակարով» տեսակի ատրճանակի պարկուճներ են հայտնաբերվել։ Քրեական գործ է հարուցվել, կասկածյալին որոնում են:

Զանգվածային թունավորում Արմավիրում: Սննդային թունավորման ախտանշաններով քաղաքի բուժկենտրոն, ընդհանուր առմամբ, 90 մարդ է դիմել: Բոլորը մարզի Արեւադաշտ գյուղի մերձակայքում գտնվող խաղողագործությամբ զբաղվող «Հայաստանի հողեր» ընկերության աշխատակիցներ են: Նշենք, որ ընկերությունը պատկանում է արգենտինահայ գործարար Էդուարդո Էռնեկյանին: Տուժածներից 20-ը բուժօգնություն ստանալուց հետո դուրս է գրվել հիվանդանոցից, իսկ 30-ը՝ տեղափոխվել Մեծամորի բժշկական կենտրոն: Բոլորի ինքնազգացողությունը գրեթե միաժամանակ է վատացել: Մասնագետները ջրի, սննդի փորձանմուշ են վերցրել կազմակերպությունից՝ թունավորման պատճառը պարզելու համար:

Նոր կառավարությունն այսօր ամբողջական կազմով առաջին նիստն է գումարել: Ինչպես անցյալ շաբաթ՝ այս անգամ էլ Նիկոլ Փաշինյանը նիստից առաջ զրուցել է տարբեր խնդիրներով կառավարության շենքի մոտ հավաքված քաղաքացիների հետ: Իսկ գործադիրի նիստի ընթացքում անդրադարձ է եղել, մասնավորապես, արագաչափերին եւ տեսախցիկներին: Վարչապետն ընդհանրապես որոշ ժամանակով դրանց գործունեությունը կասեցնելու կամ դադարեցնելու անհրաժեշտություն է տեսնում: Ոստիկանապետին եւ արդարադատության նախարարին հանձնարարել է հարցով քննարկում կազմակերպել:

Իրավապահներին Փաշինյանը եւս մեկ հանձնարարություն ուներ՝ ապրիլին անհնազանդության ակցիաների ժամանակ հարձակումների եւ ավտոմեքենաներ վնասելու մասին: Հետաքրքրվել է, մասնավորապես, Հերացի փողոցում ուսանողների վրա հարձակման գործով. նրանց ծեծողներից մեկը, ըստ տեղեկությունների, Մասիսի քաղաքապետի եղբայրն է: Հայտարարել է, որ այդ բոլոր գործերը պետք է բացահայտվել:

Այսօրվա նիստում անդրադարձ է եղել նաեւ ծառայողական մեքենաներին. Փաշինյանը մտադիր է զգալիորեն կրճատել դրանց թիվը: Իսկ նոր կառավարության անդամներից մի քանիսը, պարզվում է, արդեն հրաժարվել են իրենց ծառայողական մեքենաների մի մասից:

Նոր նշանակումներ գործադիրում. Վարդան Հարությունյանը սեփական դիմումի համաձայն ազատվել է ՊԵԿ նախագահի պաշտոնից: Կոմիտեն այսուհետ կղեկավարի Դավիթ Անանյանը, ով մինչ այդ ֆինանսների փոխնախարարն էր: Իսկ պաշտոնից հեռացող Վարդան Հարությունյանը ներկայացրել է 1.5 տարվա կատարած աշխատանքը: Նիկոլ Փաշինյանը կատակով դիմել է Դավիթ Անանյանին. «Ակնարկն ընկալեցի՞ք»:

Պաշտոնավարման 6 տարի ժամկետով էլ Վիճակագրական ծառայության կոմիտեի նախագահ է նշանակվել Ստեփան Մնացականյանը: Դեռ Ազգային ժողովում վիճակագրական ծառայության ներկայացրած տվյալների բովանդակությունը մշտապես կասկածի տակ դնող Նիկոլ Փաշինյանը հույս է հայտնել, որ կասկածներ այլեւս չեն լինի: Վարչապետը նաեւ թեմայի շուրջ մի արտահայտություն է հիշել:

Ավելի ուշ եւս մեկ նշանակում է արվել. Անվտանգության խորհրդի քարտուղար է նշանակվել քաղաքագետ, «Մերժիր Սերժին» նախաձեռնության անդամ Արմեն Գրիգորյանը: Նշենք, որ նոր Սահմանադրությամբ եւ օրենսդրական կարգավորումներով՝ Անվտանգության խորհրդի կազմում Հայաստանի նախագահը, Ազգային ժողովի խոսնակն ու ՍԴ նախագահն այլեւս ընդգրկված չեն: Ազգային ժողովում հարցի քննարկումը, հիշեցնենք, հատկապես «Ելք» խմբակցության պատգամավորների խիստ քննադատությանն էր արժանացել:

«Սասնա ծռերի» 10 անդամի եւ Կարո Եղնուկյանի գործով դատական նիստն այսօր մեկնարկել է առանց ամբաստանյալների: Դատավոր Արտուշ Գաբրիելյանը հայտնել է, որ ուղեկցող գումարտակ չկա, այդ պատճառով նրանց չեն կարողացել դատարան բերել: Այս գործով նիստին նույնպես փաստաբաններն իրենց պաշտպանյալների խափանման միջոցը փոխելու միջնորդություններ են ներկայացրել: Դրանք քննարկելու փոխարեն Արտուշ Գաբրիելյանը որոշել է մեկ շաբաթով հետաձգել նիստը:

Իսկ «Սասնա ծռերի» անդամների մի մասը երեկվանից Շենգավիթի դատարանում են. ոստիկանությունը չի կարողանում նրանց քրեակատարողական հիմնարկ տեղափոխել: Երեկվա նիստից հետո նրանց աջակիցները փակել են դատարանի բոլոր մուտքերն ու ելքերը, ինչպես նաեւ Արշակունյաց պողոտան: Նրանք վրաններ էին տեղադրել պողոտայում եւ գիշերել այնտեղ:

Այս ակցիաների մասին հարցին Նիկոլ Փաշինյանն արձագանքել է. չի կարող բացել բոլոր քրեակատարողական հիմնարկների դռները: Ավելի ուշ վարչապետը կոչ է արել այլեւս փողոցներ չփակել, փոխարենը համատեղ աշխատելու տարբերակ է առաջարկել: «Սասնա ծռերի» աջակիցներն ի վերջո բացել են Արշակունյաց պողոտան: Իսկ Գարեգին Չուգասզյանը չի պատրաստվում դադարեցնել հացադուլը. նա վաղը ասուլիս է տալու: Նշենք, որ Չուգասզյանը հացադուլի մեջ է արդեն 23 օր:

Գյումրիի քաղաքապետարանում այսօր ավագանու արտահերթ նիստ էր գումարվել: Օրակարգում միայն մեկ՝ քաղաքապետ Սամվել Բալասանյանին անվստահություն հայտնելու հարցն էր: Հետաքրքիր է, որ նախաձեռնողները՝ ավագանու 13 անդամ, հիմնականում «Բալասանյան» խմբակցությունից են: «Գալա» խմբակցության անդամները սա արհետական օրակարգ եւ կազմակերպված սցենար են համարում:

Ավագանու որոշ անդամները կարծում են, որ թիմակիցները փորձում են ապահովագրել Սամվել Բալասանյանին, քանի որ եթե անվստահության հարցը քննարկվում եւ չի ընդունվում, մեկ տարի այդ հարցին վերադառնալ այլեւս հնարավոր չէ: Մինչ քվեարկությունը Սամվել Բալասանյանը խոսել է իր հասցեին հնչող քննադատությունների, պաշտոնավարման տարիներին կատարած լուրջ գործերի մասին: Իր գործերը թվարկելիս ոգեւորվելով՝ Բալասանյանը հայտարարել է. բա որ հրաժարական տա: Ի վերջո՝ փակ գաղտնի քվեարկությամբ ավագանու անդամները դեմ են արտահայտվել քաղաքապետին անվստահություն հայտնելու հարցին:

Դոլարն ու եվրոն շարունակում են զիջել դիրքերը: Մայիսի 17-ին դոլարի փոխարժեքը կազմել է 483 դրամ, եվրոյինը՝ 570, ռուբլունը՝ 7 դրամ 81 լումա, ֆունտինը՝ 652 դրամ:

Մայիսի 18-19-ին հանրապետության հյուսիսային շրջաններում սպասվում է անձրեւ եւ ամպրոպ: Օդի ջերմաստիճանը 3-4 աստիճանով կբարձրանա: Երեւանում նույնպես առանձին հատվածներում տեղումներ կլինեն: Մայրաքաղաքում գիշերը կդիտվի +13+15, ցերեկը՝ +25+27 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 17.08.2018
Նիկոլ Փաշինյանը պաշտոնավորման 100 օրվա կապակցությամբ նախաձեռնած հանրահավաքը սկսել է Արցախի պողոտայից քայլերթով...
Օրվա գլխավոր լուրերը՝ «մեկ տողով». 16.08.2018
Տապալված մամուլի ասուլիսից հետո Ռոբերտ Քոչարյանն առաջին հարցազրույցն է տվել եւ հայտարարել, որ քաղաքականություն է վերադարձել...
Օրվա գլխավոր լուրերը՝ «մեկ տողով». 15.08.2018
Առողջապահության նախարարությունում ռումբի մասին կեղծ ահազանգի հեղինակն առողջական խնդիրներ ունեցող քաղաքացի է...
Օրվա գլխավոր լուրերը՝ «մեկ տողով». 14.08.2018
ՀՀ երկրորդ նախագահ Ռոբերտ Քոչարյանն այսօր մամուլի ասուլիս էր հրավիրել. այն, սակայն, տապալվել է...
Օրվա գլխավոր լուրերը՝ «մեկ տողով». 13.08.2018
Ռոբերտ Քոչարյանն անձեռնմխելի է. Վերաքննիչ դատարանը բավարարեց երկրորդ նախագահի պաշտպանների միջնորդությունը եւ հենց դատարանի դահլիճից...
Օրվա գլխավոր լուրերը՝ «մեկ տողով». 10.08.2018
Փաշինյանը մեկնաբանել է հայաստանյան վերջին իրադարձությունների հետ կապված Սերգեյ Լավրովի հայտարարությունը, նաեւ անդրադարձել Ռոբերտ Քոչարյանի...
Partner news