Երկու Կորեաների, Չինաստանի, Ռուսաստանի, ԱՄՆ-ի եւ Ճապոնիայի մասնակցությամբ Փհենյանի միջուկային ներուժի վերացման խնդրի վերաբերյալ վեցակողմ խորհրդակցությունների վերսկսումը ԿԺԴՀ-ի շուրջ ստեղծված իրավիճակի կարգավորման արդյունավետ տարբերակներից մեկն է: Այս մասին չորեքշաբթի օրը Ճապոնիայի խորհրդարանի ստորին պալատի Արտաքին գործերի հանձնաժողովում տեղի ունեցած բանավեճի ժամանակ ասել է երկրի արտաքին գործերի նախարար Տարո Կոնոն, փոխանցում է «ՏԱՍՍ»-ը:
Նախարարը նաեւ նշել է, որ Տոկիոն ողջունում է ԱՄՆ նախագահ Դոնալդ Թրամփի եւ ԿԺԴՀ ղեկավար Կիմ Չեն Ընի՝ հունիսի 12-ին Սինգապուրում կայանալիք հանդիպումը:
«Կարեւորն այն է՝ արդյոք Հյուսիսային Կորեան իրական պարտավորություններ կստանձնի հրթիռամիջուկային ներուժից հրաժարվելու գործում: Ոչ պակաս կարեւոր է նաեւ այն՝ կկարողանա արդյոք միջազգային հանրությունը պահպանել պատժամիջոցների ռեժիմը Հյուսիսային Կորեայի դեմ այնքան ժամանակ, մինչեւ կհասնի լիարժեք ապամիջուկայնացման», - նշել է նախարարը:
Ճապոնիայի արտաքին գործերի նախարարության ղեկավարը նշել է, որ ԱՄՆ-ն հստակ հասկացրել է, որ չի վերացնելու ներկայիս ճնշման միջոցները ԿԺԴՀ-ին դեմ, սակայն նոր պատժամիջոցներ եւս մտադիր չէ կիրառել:
