Սինգապուրում Հյուսիսային Կորեա-ԱՄՆ առաջիկա գագաթնաժողովի ժամանակ տեղաշարժվելու համար Կեմ Չեն Ընին կտրամադրեն հատուկ սերիայի BMW 760 զրահապատ սեւ ավտոմեքենաներ, հայտնում է The Straits Times պարբերականը:
Պարբերականի աղբյուրների տեղեկություններով՝ Սինգապուրի հատուկ տրանսպորտի պարկից տրամադրվել է այդպիսի 4 մեքենա: Դրանցից յուրաքանչյուրն ունի 6-գլանանի տուրբոշարժիչ՝ 544 ձիաուժ հզորությամբ: Տեղադրված են հատուկ զրահապատ ապակիներ՝ 6 սմ հաստությամբ, որոնք կարող են ուղեւորներին պաշտպանել դիպուկահար հրացանի կրակոցներից: Ավտոմեքենայի զրահապատ թափքը դիմանում է պայթյունների, որոնց հզորությունը համարժեք է մինչեւ 15 կգ տրոտիլին:
Մեքենայի սրահում կան քիմիական հարձակման դեպքում օդը մաքրելու համակարգեր, գիշերային տեսանելիության եւ այլ տարրեր, որոնք մեծացնում են ավտոմեքենայում գտնվողի վերապրելիությունը:
Ինչպես նշում է Ս. Ռաջարաթնամի միջազգային հետազոտությունների դպրոցի գիտաշխատող Շվան Հոն, Հյուսիսային Կորեայի առաջնորդը ջանում է արտասահմանյան հազվադեպ ուղեւորությունների ժամանակ օգտվել սեփական ավտոմեքենաներից: Այդպես է եղել այս տարվա մարտին Պեկին ուղեւորության ժամանակ, երբ Հյուսիսային Կորեայի պատվիրակությունը Փհենյանից բերել էր զրահապատ Mercedes S600 Pullman-ը: Այդպես է եղել նաեւ ապրիլի վերջին միջկորեական գագաթնաժողովի ժամանակ:
Նրա կարծիքով՝ Հյուսիսային Կորեայի ներկայացուցիչներն այս անգամ չեն ծրագրում տրանսպորտ բերել: Հնարավոր է՝ սա կապված է Սինգապուր նման տեխնիկան հասցնելու լոգիստիկ դժվարությունների հետ:
Ինչպես հայտարարել էր ԱՄՆ վարչակազմը, Դոնալդ Թրամփի եւ Կիմ Չեն Ընի պատմական հանդիպումը տեղի կունենա հունիսի 12-ին Սենտոս կղզու Capella հյուրանոցում:
