Տարածաշրջանում ռազմական զորավարժությունների դադարեցման մասին ԱՄՆ նախագահ Դոնալդ Թրամփի հայտարարությունը կնպաստի կորեական կարգավորման ճիշտ տեմպերի հետագա աճին: Այս մասին հայտարարել է Ռուսաստանի արտգործնախարար Սերգեյ Լավրովը, փոխանցում է «ՌԻԱ Նովոստի»-ն:
Նրա խոսքով՝ ճիշտ տեմպերի աճին կնպաստի նախագահ Թրամփի հայտարարությունն այն մասին, որ այս փուլում Հարավային Կորեայի եւ Ամերիկայի կողմից հերթական զորավարժությունների անցկացման անհրաժեշտություն չկա:
Լավրովը նշել է, որ Վաշինգտոնի եւ Փհենյանի կողմից ստորագրված փաստաթուղթը հստակ շրջանակային բնույթ է կրում, եւ մանրամասների համաձայնեցման համար, հատկապես՝ միջուկային ներուժի հետ կապված առավել բարդ խնդիրին առնչվող մանրամասների, անշուշտ, շատ երկար ժամանակ կպահանջվի: «Հուսով եմ, որ բանակցող կողմերը բավարար համբերություն կդրսեւորեն այս հարցում»,- ասել է Լավրովը:
Նրա կարծիքով, հաշվի առնելով ԱՄՆ-ի եւ ԿԺԴՀ-ի միջեւ առկա խնդիրների լուծման ողջ կարեւորությունը, ներառյալ՝ թերակղզու ապամիջուկայինացման եւ անվտանգության երաշխիքների փուլերը, պարզ է, որ երկկողմ ձեւաչափով այդ խնդիրներն ամբողջությամբ լուծվել չեն կարող: