Բրիտանիան ամերիկյան ապրանքատեսակների համար սահմանված ԵՄ մաքսատուրքերը համամասնական պատասխան է համարում։ Այս մասին հայտարարել է երկրի վարչապետ Թերեզա Մեյի ներկայացուցիչը՝ հավելելով, որ մաքսատուրքերի հարցը կքննարկվի ԱՄՆ նախագահ Դոնալդ Թրամփի հետ հուլիսին Լոնդոն կատարելիք այցի ժամանակ, փոխանցում է Reuters–ը։
«Մենք գտնում ենք, որ ԵՄ–ն կշռադատված եւ համամասնական պատասխան է տվել, մենք այն սատարում ենք»,–ասել է նա՝ հավելելով, որ Բրիտանիան ցանկանում է խուսափել առեւտրային տարաձայնությունների հետագա լարվածությունից։
Հիշեցնենք, որ հունիսի 22-ից ուժի մեջ է մտել մի շարք ամերիկյան ապրանքատեսակներ Եվրոպա ներկրելու համար սահմանված մաքսատուրքերը։ Այսպիսի որոշում ԵՄ–ն ընդունել է ի պատասխան ԱՄՆ կողմից սահմանված պողպատի ու ալյումինի մաքսատուրքերին։