Միջազգային հանրությունը վաղուց ձանձրացել է Թուրքիայի եւ Ադրբեջանի՝ Հայաստանի կողմից Ադրբեջանի տարածքի 20 տոկոսի «օկուպացիայի» մասին հեքիաթներից: Այդ մասին NEWS.am-ի թղթակցի հետ զրույցում ասել է Հայաստանի հանրապետական կուսակցության խմբակցության քարտուղար Էդուարդ Շարմազանովը՝ մեկնաբանելով Թուրքիայի արտգործնախարար Ահմեդ Դավութօղլուի՝ ԵԽԽՎ նստաշրջանում արած հայտարարությունը, թե Հայաստանն «օկուպացրել է Ադրբեջանի տարածքը»:
«Ով-ով, բայց Թուրքիան հաստատ իրավունք չունի խոսելու տարածքների օկուպացիայից, քանի որ դա այն երկիրն է, որ ցեղասպանության գնով տիրացել է պատմական հայկական հողերին, բռնազավթման եւ կոտորածների գնով տեր է դարձել Պոնտոսի հույների պատմական հողերին: Երրորդ, Թուրքիան այն երկիրն է, որի ֆինանսավորմամբ եւ ռազմական աջակցությամբ Ադրբեջանն օկուպացրել է Լեռնային Ղարաբաղի կազմի մեջ մտնող Շահումյանը, Գետաշենը, Մարտունաշենն ու Մարտակերտի մի մասը: Եւ, վերջապես, Թուրքիան այն երկիրն է, որի ջանքերով փակ է մնում Եվրոպայի վերջին փակ սահմանը»,- արձանագրել է Շարմազանովը: