Անմիջականորեն արտաքին տնտեսական գործունեություն իրականացնող (ոչ միջնորդավորված) տնտեսվարող սուբյեկտները Թուրքիայից ապրանք ներկրողների բողոքի ակցիային չեն մասնակցել: Այսօր՝ հունվարի 26-ին նման հայտարարությամբ հանդես եկավ Պետեկամուտների կոմիտեի հարկային տեսչությունների աշխատանքների համակարգման վարչության պետի տեղակալ Խաչատուր Եղոյանը:
Ըստ նրա՝ տնտեսվարող սուբյեկտներն իրենց իրական շրջանառությունը թաքցնելու, հարկերից խուսափելու կամ ինչ-ինչ պատճառներով տնտեսական գործունեությունը (ապրանքների ներկրումը Թուրքիայից կամ Չինաստանից) իրականացնում են միջնորդավորված՝ բեռնափոխադրող կազմակերպությունների միջոցով։ Այսինքն՝ հարկային մարմինը չի կարողանում պարզել, թե ի վերջո ով է տվյալ ապրանքի իրական սեփականատերը։
Նա նշեց, որ բեռնափոխադրումների (ներառյալ մաքսազերծումը) արժեքը թանկացրել են միջնորդ կազմակերպությունները, եւ խոստացավ, որ նրանց նկատմամբ հարկային վարչարարությունը հետագայում կխստացվի։