Տնտեսական ճգնաժամը դեղագործության ոլորտի վրա ազդեցություն չի գործել։ Հունվարի 29-ին Աղվերանում ընթացող դեղագործության ոլորտի ներկայացուցիչների, առանց փողկապների երկրորդ հանդիպման ժամանակ այս մասին հայտարարեց Էկոնոմիկայի փոխնախարար Կարինե Մինասյանը։
Ըստ նրա՝ 2009 թվականի ճգնաժամային տարում Հայաստանն ունեցել է դեղագործության ոլորտի 8 տոկոսանոց աճ, իսկ 2010 թվականի 11 ամիսների ընթացքում՝ մինչեւ 18,7 տոկոսի աճ։ Ընդ որում, արտահանումն ԱՊՀ երկրներից շարժվել է դեպի եվրոպական երկրներ։ Դա խոսում է այն մասին, որ հայկական դեղերի որակը բարելավվել է եւ համապատասխանում է եվրոպական չափանիշներին։
Կարինե Մինասյանը նշեց նաեւ, որ Հայաստանում ներկայումս գոյություն ունեն դեղարտադրող 18 ձեռնարկություններ, սակայն նրանցում աշխատող մարդկանց թվաքանակը նվազել է։ Փոխնախարարը հույս հայտնեց, որ դա տեղի է ունեցել արդյունավետության բարձրացման հաշվին։
Համաժողովին ներկա դեղարտադրող ընկերությունների ներկայացուցիչները նշեցին, որ հարեւան երկրների, մանավանդ Վրաստանի կողմից իրենց բիզնեսը տեղափոխելու ավելի լավ առաջարկներ են ստանում։
Կարինե Մինասյանը խոստովանեց, որ ճգնաժամից հետո շատ երկրներ վերանայում են իրենց հարկային դրույքաչափերը, սակայն այս հարցը մեր օրակարգում չկա։ Հայաստանը փորձում է ստեղծել ազատ տնտեսական գոտիներ, որտեղ դեղարտադրող ձեռնարկությունները կարող են առանց ԱԱՀ վճարման գործունեություն ծավալել։