Հարավային Կորեան կկրճատի ազգային ԶՈՒ թվաքանակը, ինչպես նաեւ 2022 թվականին պարտադիր զինվորական ծառայության տեւողությունը, հայտնում է Yonhap գործակալությունը:
Գործակալության տեղեկություններով՝ Հարավային Կորեան բարեփոխման շրջանակում կկրճատի զորակոչիկների պարտադիր զինվորական ծառայության ժամկետը 21-ից մինչեւ 18 ամիս, ինչպես նաեւ կնվազեցնի մարտական խնդիրների հետ չկապված տեխնիկական պաշտոններին ներգրավվող քաղաքացիական մասնագետների թիվը:
Կանոնավոր բանակի անձնակազմը եւս կկրճատվի 618 հազարից մինչեւ 500 հազար ծառայող, իսկ գեներալակազմը՝ 17 տոկոսով, 436-ից մինչեւ 360 մարդ:
Զինծառայողների թվաքանակի կրճատումը երկրում ժողովրդագրական անկման հաղթահարման ծրագրի մասն է, որի պատճառը ցածր ծնելիությունն է:
Ուրբաթ բարձրագույն զինվորական հրամանատարության հետ հանդիպման ժամանակ տեղի ունեցած ճեպազրույցում Հարավային Կորեայի նախագահ Մուն Չժե Ինը կոչ է արել բարեփոխումներն անհապաղ սկսել: Նա կրկին հայտարարել է 2016 թվականին զանգվածային ցույցերը ճնշելու համար ռազմական դրություն հայտարարելու մասին նախորդ վարչակազմի զինվորական հրամանատարության օրինագծի ապօրինի լինելու մասին: Այդ ժամանակ երկրում զանգվածային ցույցեր էին ընթանում ընդդեմ երկրի նախագահ Պակ Կըն Հեի, ում մեղադրել են պետական գաղտնիքի հրապարակման եւ կոռուպցիայի մեջ:
