Արմեն Գեւորգյանին մեղադրանք է առաջադրվել արդարադատության իրականացմանը խոչընդոտելու համար: Նրա գործը միացվել է Մարտի 1-ի քրեական գործին: Գեւորգյանի նկատմամբ որպես խափանման միջոց է ընտրվել չհեռանալու մասին ստորագրությունը:

Մեղադրանքի հիմքը Wikileaks-ի հրապարակումն է: Դրա համաձայն՝ 2008 թվականի փետրվարի 28-ից մարտի 8-ն ընկած ժամանակահատվածում, երբ Սահմանադրական դատարանում քննվում էին նախագահական ընտրությունների արդյունքները վիճարկող թեկնածուներ Տիգրան Կարապետյանի եւ Լեւոն Տեր-Պետրոսյանի դիմումները, Արմեն Գեւորգյանը ճնշում է գործադրել դատարանի դատավոր Վալերի Պողոսյանի նկատմամբ, որպեսզի ընտրությունների արդյունքներն անփոփոխ թողնելու որոշում կայացվի:

Վալերի Պողոսյանը, սակայն, հերքել է տեղեկությունները, որ քննչական մարմնին ցուցմունք է տվել Արմեն Գեւորգյանի կողմից իր վրա ճնշում գործադրելու մասին: Ասում է՝ պարզապես որոշ փաստեր է հայտնել, որոնք մեկնաբանվել եւ ներկայացվել են որպես ճնշում: Նա, սակայն, չի նշում, թե ինչ փաստեր է ներկայացրել:

Ռոբերտ Քոչարյանի խափանման միջոցը կալանավորումը փոխելու վերաբերյալ վերաքննիչ բողոքը կքննվի օգոստոսի 9-ին: Երկրորդ նախագահի պաշտպաններից Արամ Օրբելյանի տեղեկացմամբ՝ նիստը նշանակված է ժամը 12:00-ին: Իսկ Քոչարյանի խափանման միջոց կալանավորումը փոխելու պահանջով ՀՀԿ-ի նախաձեռնած ստորագրահավաքին 45 պատգամավոր է միացել: Նրանց երաշխավորագիրն արդեն դատախազություն է ներկայացվել: Այն քննարկվում է:

Հայտնի է, որ ստորագրահավաքին միացել են ԱԺ նախագահ Արա Բաբլոյանն ու փոխնախագահներ Էդուարդ Շարմազանովը եւ Արփինե Հովհաննիսյանը։ Մնացած պատգամավորների անունները հայտնի չեն: Երկրորդ նախագահի գրասենյակի ղեկավար Վիկտոր Սողոմոնյանը նշել է միայն, որ ստորագրողները միայն ՀՀԿ-ականներ չեն, կան նաեւ Դաշնակցություն խմբակցությունից։

Յուրի Խաչատուրովը մեկնել է Երեւանից: ՀԱՊԿ գլխավոր քարտուղարը վերադարձել է Մոսկվա՝ աշխատանքային պարտականությունների կատարմանը: Խաչատուրովին, հիշեցնենք, Մարտի 1-ի գործով սահմանադրական կարգը տապալելու մեղադրանք է առաջադրվել: 2008 թվականին նա Զինված ուժերի Երեւանի կայազորի պետն էր: Հատուկ քննչական ծառայությունը հաստատել է, որ որպես խափանման միջոց գրավի կիրառումը չի ենթադրում, որ Յուրի Խաչատուրովը չի կարող հեռանալ Հայաստանից, եւ բավարարել նրա պաշտպանի համապատասխան միջնորդությունը: Խաչատուրովը, սակայն, պարտավոր է առաջին իսկ պահանջով ներկայանալ քննչական մարմնին:

Կաշառքի վերցնելու մեջ մեղադրվող դատավոր Իշխան Բարսեղյանը դատապարտվեց 7 տարվա ազատազրկման: Գործով մյուս ամբաստանյալ՝ կաշառքի միջնորդություն կատարելու մեջ մեղադրվող փաստաբան Էլզա Զաքարյանին դատարանը որոշեց տուգանել 120 հազար դրամով: Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի գետնանցումներից մեկում անձամբ ստացել էր 1000 դոլար: Գումարը փոխանցվել էր ԱԱԾ աշխատակիցների օպերատիվ վերահսկողությամբ:

Սյունիքի նախկին մարզպետ Սուրիկ Խաչատրյանի որդուն մեղադրանք է առաջադրվել. 22-ամյա Տրդատ Խաչատրյանին  մեղադրում են փաստաթուղթ կեղծելու կամ խաբեության ճանապարհով ժամկետային զինվորական կամ այլընտրանքային ծառայությունից խուսափելու համար: Սրա համար մինչեւ 5 տարի ժամկետով ազատազրկում է նախատեսվում:

Պարտադիր զինծառայությունից խուսափել է նաեւ Խաչատրյանի մյուս որդին՝ Տիգրանը: Ոստիկանության տեղեկություններով՝ Տիգրան եւ Տրդատ Խաչատրյանները զինծառայությունից ազատվել են հիվանդության հիմքով, սակայն փաստացի ժամկետային զինվորական ծառայությունից ազատվելու համար հիմք հանդիսացող հիվանդությամբ չեն տառապում: Նախապատրաստված նյութերը զինվորական դատախազություն են ուղարկվել:

Արցախում դժբախտ պատահարի հետեւանքով պայմանագրային զինծառայող եւ քաղաքացիական անձ է մահացել: Նախնական տվյալներով՝ Մարտակերտի 43-ամյա բնակիչ Արամ Սարգսյանն ու Ստեփանակերտի 36-ամյա բնակիչ Արմեն Հովակիմյանը ջրահեղձ են եղել լճում լողանալիս: Հովակիմյանը Արցախի պաշտպանության բանակի պայմանագրային զինծառայող էր: Տղամարդկանց դիերը դուրս են բերել Խաչենի ջրամբարից:

Ռուս-վրացական սահմանի Վերին Լարսի անցակետում հերթեր են գոյացել: Տրանսպորտի փոխնարարը տեղեկացրել է, որ խնդիրներ կան թե՛ ռուսական, թե՛ վրացական հատվածում: Ըստ Արմեն Փամբուկչյանի՝ ռուսական կողմից հերթի երկարությունը 9-10 կմ է, ընդ որում մեքենաների մեծ մասը բեռնատարներ են, իսկ իսկ վրացական կողմում, ընդհանուր առմամբ, շուրջ 200 բեռնատար է կանգնած: Հերթերը թեթեւացնելու համար ռուսական կողմում, սովորական 5-ի փոխարեն, 7-10 անցակետով են բաց թողնում մեքենաները, սակայն արդյունքում հերթեր են գոյանում վրացական կողմում: Վարչապետի հանձնարարությամբ նախարար Աշոտ Հակոբյանը Վերին Լարս է մեկնկել՝ իրավիճակին տեղում ծանոթանալու նպատակով: Նշենք, որ հայկական բեռնատարների մի մասը շուտ փչացող պտուղ-բանջարեղեն է տեղափոխում:

Վենեսուելայի նախագահ Նիկոլաս Մադուրոյի դեմ մահափորձ է կատարվել: Դեպքը տեղի է ունեցել զինվորական շքերթի ժամանակ: Մի քանի թռչող սարքեր են պայթել, ինչի հետեւանքով 7 զինծառայող է վիրավորվել: Նախագահը, սակայն, չի տուժել: Իր մահափորձին մասնակցության մեջ Մադուրոն մեղադրել է «վենեսուելական եւ կոլումբիական ծայրահեղ աջերին», այդ թվում՝ Կոլումբիայի նախագահին: Այդ երկրի ԱԳՆ-ն, սակայն, հերքել է Վենեսուելայի նախագահի հայտարարությունը:

Իսկ մահափորձի պատասխանատվությունը ստանձնել է ընդհատակյա «Ֆլանելե զինվորներ» (Soldados de Franelas) խմբավորումը: Այն որպես ազգային-ազատագրական շարժում է ներկայանում: Մահափորձի գործով 11 լրագրող է ձերբակալվել, այդ թվում՝ վենեսուելական, արգենտինական եւ իսպանական պարբերականների աշխատակիցներ: Վենեսուելայի Մամուլի աշխատողների ազգային միությունը ձերբակալություններն անհիմն եւ տեղեկատվության իրավունքի խախտում է որակել: 

Օգոստոսի 6-ին դոլարի վերելքը շարունակվել է, եվրոն փոքր-ինչ էժանացել է: Դոլարի փոխարժեքը կազմել է 481 դրամ, եվրոյինը՝ 553, ռուբլունը՝ 7 դրամ 58 լումա, ֆունտինը՝ 624 դրամ:

Օգոստոսի 7-8-ի գիշերը եւ երեկոյան ժամերին հանրապետության հյուսիսային շրջաններում սպասվում է անձրեւ եւ ամպրոպ, առանձին հատվածներում՝ կարկուտ: Օդի ջերմաստիճանը 2-3 աստիճանով կնվազի: Երեւանում նույնպես հնարավոր են տեղումներ: Մայրաքաղաքում գիշերը կդիտվի +20+22, ցերեկը՝ +33+35 աստիճան տաքություն: