Իրանի քաղաքական ղեկավարությունն ունի այն քաղաքական ու տնտեսական պաշարները, որոնք այս երկրին թույլ կտան խուսափել խորը տնտեսական ճգնաժամից: NEWS.am-ի թղթակցի հետ զրույցում այսպիսի կարծիք հայտնեց իրանագետ Կարեն Վերանյանը:
Փորձագետը նշեց, որ դեռեւս նոր պատժամիջոցների սահմանումից առաջ իրանական ազգային արժույթը կրկնապատիկ անկում էր գրանցել, ինչն, իր հերթին, հանգեցրել էր շուկայում ապրանքների թանկացման եւ բողոքի ակցիաների:
«Կարելի է ասել, որ գործընթացն արդեն վաղուց էր սկսվել, եւ սա պետք է արձանագրել: Պատժամիջոցներն, իհարկե, իրանական տնտեսության համար լրացուցիչ բեռ կդառնան, հատկապես ԵՄ-ի եւ մի շարք եվրոպական ընկերությունների հետ տնտեսական համագործակցության համատեքստում»,- պարզաբանեց Վերանյանը:
Ընդ որում՝ իրանագետը նշեց, որ չնայած ԱՄՆ-ի կողմից Իրանի դեմ միակողմանի պատժամիջոցներին, միանգամայն հնարավոր է, որ որոշ եվրոպական ընկերություններ շարունակեն համագործակցել իրանական ընկերությունների հետ: Արեւելագետը միաժամանակ չբացառեց, որ ԵՄ-ն հստակ մեխանիզմներ է ստեղծել, որոնք վկայում են եվրոպական ընկերությունների համար իրավաբանական հետեւանքների բացակայության մասին, որոնք մտադիիր են Իրանի հետ համագործակցել: