Անցած հինգշաբթի Սաուդյան Արաբիայի գլխավորած արաբական կոալիցիայի ՌՕՈՒ ավիահարվածի հետեւանքով, որը հասցվել էր Եմենի հյուսիս-արեւմուտքում Սաադա նահանգում, առնվազն 51 մարդ է զոհվել, որոնց թվում՝ 40 երեխա: Այս մասին նշված է Կարմիր խաչի միջազգային կոմիտեի հաշվետվության մեջ, հայտնում է AFP-ն:
Թարմացված տեղեկություններով՝ ռմբակոծության հետեւանքով 76 մարդ, որոնց թվում 56 երեխա, ստացել են տարբեր ծանրության վնասվածքներ: Օգոստոսի 9-ին ԿԽՄԿ-ն հայտնել էր 29 զոհվածի եւ 48 տուժածի մասին:
Հուսի խռովարարների («Անսար Ալլահ» շարժման կողմնակիցների) կառավարության կողմից վերահսկվող Al Masirah հեռուստաալիքի տեղեկություններով՝ օգոստոսի 9-ին Սաադա նահանգում արաբական կոալիցիայի ՌՕՈՒ հարձակմանն է ենթարկվել ավտոբուսը, որի մեջ հիմնականում երեխաներ ու դեռահասներ են եղել:
Արաբական կոալիցիայի պաշտոնական ներկայացուցիչն, իր հերթին, հայտնել է, որ դաշինքի կործանիչները հարված են հասցրել հուսիների օբյեկտին, որտեղից օգոստոսի 8-ին բալիստիկ հրթիռ էր արձակվել սաուդյան Ջիզան նահանգի ուղղությամբ:
Եմենում կառավարական ուժերի եւ հուսի խռովարարների միջեւ դիմակայությունը շարունակվում է 2014 թվականի օգոստոսից: Այն առավել ակտիվ փուլ էր մտել 2015 թվականի մարտին Սաուդյան Արաբիայի գլխավորած կոալիցիայի ներխուժմամբ: Եմենի Իրավունքների եւ զարգացման կենտրոնի տվյալներով՝ 2015 թվականի գարնանից երկրում սպանվել է ավելի քան 10 հազար խաղաղ բնակիչ, այդ թվում՝ գրեթե 2,4 հազար երեխա եւ մոտ 2 հազար կին: Նույն ժամանակահատվածում վիրավորվել է 18,5 հազար եմենցի: