Ներքին զորքերի զինծառայող Տիգրան Աբգարյանը սպանվել է հատուկ ջոկատայինների կողմից: Այս մասին այսօր՝ սեպտեմբերի 11-ին, լրագրողների հետ հանդիպմանը հայտարարեց Հատուկ քննչական ծառայության պետ Սասուն Խաչատրյանը:
«Այդ մասին ունենք հստակ ապացույցներ: Այսինքն՝ ինչի մասին է սա խոսում. Տիգրան Աբգարյանը սպանվել է այն ժամանակ, երբ արդեն իսկ Քոչարյանը մտցրել էր արտակարգ դրություն, բայց դեռ հրազենային վիրավորում ստացած որեւէ զինծառայող չկար: Եվ մեր վերսիան, որը հետեւյալն էր, որ Տիգրան Աբգարյանին հրազենային վիրավորում է հասցվել նրա համար, որ Քոչարյանի խոսքերը, որ արդեն ունենք զոհեր, հիմնավորվի, դա նախաքննությամբ հիմնավորվել է: Այս նորությունը արդեն իսկ բավարար է, որ իմ եւ պարոն Վանեցյանի դեմ իսկական որս սկսվեր, այդ իսկ պատճառով չէինք հրապարակում այս տվյալները»,- ասաց Սասուն Խաչատրյանը:
ՀՔԾ պետը հայտնեց նաեւ, որ Մարտի 1-ի գործով ապացույցներ են ձեռք բերվել, որ ՊՆ պահեստից ստացվել են մեծ քանակությամբ զինվորական հագուստներ, որոնք բաժանվել են օլիգարխների թիկնազորներին. «Ում են բաժանվել, ես հիմա չեմ ասի, իսկ թե ինչու են բաժանվել, հայտնի է, որ չտարբերվեն մյուս զինծառայողներից»:
Նշենք, որ Տիգրան Աբգարյանը ծառայել է ոստիկանական հատուկ զորքերում։ Վիրավորվել է 2008 թվականի մարտի 1-ին, 41 օր կոմայի մեջ է եղել և մահացել է ապրիլի 10-ին: