Հաշվի առնելով վարչապետի մատնանշած, հաշվի առնելով վարչապետի եւ ԲՀԿ ղեկավար Գագիկ Ծառուկյանի միջեւ կնքված հուշագրի բովանդակությունը, մենք վերահաստատում ենք Ընտրական օրենսգրքի փոփոխություններն ընդունել այն հաշվարկով, որ չխախտվեն սահմանված ժամկետները: Այս մասին, այսօր՝ հոկտեմբերի 29-ին, ԱԺ արտահերթ նիստում Ընտրական օրենսգրքի փոփոխությունների քննարկման ժամանակ նշեց «Ծառուկյան» խմբակցության պատգամավոր Գեւորգ Պետրոսյանը: Նա առաջացրկեց, որ օրինագծերի փաթեթը քննարկվի 24-ամյա ռեժիմով:
«Ելք» խմբակցության պատգամավոր Էդմոն Մարուքյանը հետաքրքրվեց, թե վարչապետի եւ Գագիկ Ծառուկյանի միջեւ կնքված հուշագիրն ի՞նչ կապ ունի Ընտրական օրենսգրքի եւ նման ռեժիմով այն քննարկելու հետ:
«Հուշագիրն այնքանով է առնչվում, որ «Ծառուկյան» դաշինքն այն խմբակցությունն էր, որ Ընտրական օրենսգրքի փոփոխությունների ընդունումը տապալելուց հետո նախաձեռնեց երկրորդ արտահերթ նիստը կրկին հիմք ընդունելով մեր ստանձնած պարտավորությունների կատարումը»,-ասաց Գեւորգ Պետրոսյանը:
Մարուքյանը նկատեց, որ հուշագիրը մինչ այդ էր ստորագրվել եւ նախորդ անգամ երբ օրինագիծը տապալվել է, բացակայողներ են եղել նաեւ «Ծառուկյան» խմբակցությունից. «Հետեւաբար, շահարկել փաստը, որ տապալվել է եւ մենք հուշագիր ենք ստորագրել ու հիմա նախաձեռնում ենք նոր նիստ,... դա կառավարության նախագիծն է, եւ դա միայն «Ծառուկյան» խմբակցության նախագիծը չէ: Նաեւ «Ելք» խմբակցության նախաձեռնությունն է, դրա համար պետք չի նախագիծը ներկայացնել հուշագրի լույսի ներքո»:
Հիշեցնենք, որ ուղիղ մեկ շաբաթ առաջ այս փաթեթի ընդունումը ԱԺ արտահերթ նիստում տապալվել էր, քանի որ ՀՀԿ-ն դեմ էր արտահայտվել նախագծին եւ չէր մասնակցել քվեարկությանը: Արդյունքում նախագծին կողմ էր քվեարկել 56 պատգամավոր, մինչդեռ անհրաժեշտ էր 63 կողմ ձայն:
