«Ծառուկյան» դաշինքի խորհրդարանական խմբակցության քարտուղար Վահե Էնֆիաջյանը խուսափեց ուղիղ պատասխանել հարցին, թե արդյոք ԲՀԿ-ն պատրաստ է «Իմ Քայլը» դաշինքի հաղթանակի դեպքում դառնալ կոալիցիայի մաս:
Նոյեմբերի 19-ի ճեպազրույցում Էնֆիաջյանը հայտարարեց, որ ռեյտինգային ընտրակարգով առաջադրվելու է 4-րդ ընտրատարածքից: Այդտեղ ՀՀԿ-ի հիմնական հակառակորդը լինելու է Արմեն Աշոտյանը: Միեւնույն ժամանակ, Վահե Էնֆիաջյանը խուսափեց բազմաթիվ հարցերից այն մասին, թե արդյոք ԲՀԿ-ն իշխանության կամ ընդդիմության մեջ կլինի: Պատգամավորը բոլոր նման հարցերին պատասխանում էր, որ ժողովուրդը կորոշի՝ քաղաքական ուժի համար տրված ձայներով:
Հարցին՝ վախենում է արդյոք ԲՀԿ-ն Փաշինյանին ընդդիմություն լինել, պատգամավորը պաթոսով ասաց, որ քաղաքական գործիչները չեն վախենում, իսկ ԲՀԿ-ն միշտ առաջնորդվել է պատասխանատվության զգացումով:
«Եթե սխալներ ենք տեսնում, մենք չենք վախենում այդ մասին ասել», - վստահեցրեց Էնֆիաջյանը:
Իսկ ինչ վերաբերում է նրան, թե պատրաստ է արդյոք ԲՀԿ-ն «Իմ Քայլը» դաշինքի հաղթանակի դեպքում դառնալ կոալիցիայի մաս, Էնֆիաջյանը հիշեցրեց, որ որոշումները կայացնում է քաղաքական խորհուրդը: Երբ ընտրությունները կայանան, քաղխորհուրդը կքննարկի հետագա գործողությունները, նկատեց նա:
