Ազգային ժողովի արտահերթ ընտրությունների համար Հայաստանի Հանրապետության հրավերի հիման վրա նոյեմբերի 22-ին ԱՊՀ դիտորդների առաքելությունը եւ նրա շտաբերը սկսել են նախընտրական արշավի մոնիթորինգը:
ԱՊՀ դիտորդների առաքելության շտաբի մամուլի ծառայությունը հաղորդում է, որ այդ օրը ԱՊՀ դիտորդների առաքելության շտաբի ղեկավար Եվգենի Սլոբոդան հանդիպել է ԿԸՀ նախագահ Տիգրան Մուկուչյանի հետ:
Հանդիպման ընթացքում կողմերը քննարկել են առաջիկա ընտրությունների հետ կապված հարցեր: ԿԸՀ նախագահը տեղեկացրել է նախընտրական քարոզչության ընթացքի մասին, մանրամասն խոսել ընտրությունների նախապատրաստման համար հատկացված սուղ ժամանակային պայմաններում Կենտրոնական ընտրական հանձնաժողովի աշխատանքների մասին:
Իր հերթին, առաքելության շտաբի պետը շեշտել է, որ առաքելության գործունեությունը հրապարակային եւ բաց կլինի: Միեւնույն ժամանակ, առաքելությունը ելնում է այն փաստից, որ ընտրությունները պետության ներքին խնդիրն են, եւ առաքելության խնդիրն է գնահատել նախընտրական արշավը ազգային օրենսդրության, Համագործակցության շրջանակներում ընդունված փաստաթղթերի եւ ընտրությունների կազմակերպման եւ անցկացման ոլորտում միջազգային իրավունքի ընդհանուր սկզբունքների եւ նորմերի համապատասխանության տեսանկյունից:
Հայաստանի փոխարտգործնախարար Աշոտ Հովակիմյանի հետ հանդիպման ժամանակ քննարկվել են նախընտրական քարոզչությանն առնչվող հարցեր, ինչպես նաեւ ԱՊՀ դիտորդների առաքելության աշխատանքների կազմակերպումը:
Հանդիպման ընթացքում փոխարտգործնախարարը ԱՊՀ դիտորդներին հավաստիացրել է, որ առաքելությունը անհրաժեշտ աջակցություն կստանա ազգային օրենսդրության շրջանակներում իր գործառույթները իրականացնելու համար: Ներկայումս առաքելությունը ձեւավորվում է: Նախատեսվում է, որ նրա կազմում կլինի մինչեւ 70 մարդ, ընդ որում 20-ը կաշխատի երկարաժամկետ հիմունքով:
Առաքելության շտաբը պարբերաբար կտեղեկացնի իր գործունեության մասին: