Ես Հայաստանի միակ ղեկավարն եմ, որի որդին ոչ միայն ծառայում է բանակում, այլ ծառայում է Արցախում: Այս մասին, այսօր՝ նոյեմբերի 27-ին, Ալավերդի քաղաքի հրապարակում բնակիչների հետ հանդիպման ժամանակ հայտարարեց ՀՀ վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը:
«Էդ ո՞ր խելոքն է մտածել, որ ես իմ որդուն ուղարկել եմ Ղարաբաղ ծառայելու, որ Ղարաբաղը հանձնե՞մ: Նույնիսկ Ղարաբաղի ղեկավարների երեխաները Ղարաբաղում չեն ծառայել եւ ընդհանրապես բանակում չեն ծառայել:
Իրենք Ղարաբաղը պահողն էին, մենք էլ Ղարաբաղը հանձնո՞ղն ենք:
Մենք մեր ներուժը կենտրոնացնելու ենք Ղարաբաղի հարցում մեր ժողովրդի իրավունքները պաշտպանելու համար: Ով ուզում է կանգնել Ղարաբաղի կողքին, թող կանգնի մեր կառավարության, մեր դաշինքի կողքին»,-հայտարարեց Փաշինյանը:
Նա ընդգծեց, որ հիմա էլ տեսնելով, որ «Իմ քայլը» դաշինքը վայելում է ժողովրդի ջախջախիչ մեծամասնության վստահությունը, թեզեր են դրվում շրջանառության մեջ, թե հեսա գալու է էն ժամանակը, երբ ժողովուրդը պահանջներ դնի կառավարության առջեւ ու մենք էլ իբր չենք կարողանալու բավարարենք դրանք: «Մենք կետ առ կետ աշխատելու ենք տնտեսական բոլոր խնդիրները լուծելու համար»,-ընդգծեց նա:
