Հարավաֆրիկացի գիտնականները հայտնաբերել են, որ աֆրիկական մագիլավոր գորտերը ուտում են ոչ միայն սեփական շերեփուկների, այլեւ այլ տեսակների ժառանգներին, այդ թվում՝ անհետացման եզրին գտնվողների, հայտնում է Daily Mail-ը:
Հարավային Աֆրիկայում Սթելենբոսի համալսարանից Ջոն Միզին ուսումնասիրել է գորտի ճաշացանկի նախապատվությունները՝ կենդանիներին դնելով տարբեր շերեփուկներով ակվարիումի մեջ:
Պարզվել է, որ աֆրիկական մագիլավոր գորտերը նախընտրում են ուտել իրենց «զարմիկներին»՝ տեղական Cape platanna տեսակին, որը անհետացման եզրին է: Գորտերի այս տեսակը բնակվում է Քեյփթաունից ոչ հեռու գտնվող լճերում, որտեղ կանիբալ գորտերին բազմացրել են որպես տնային կենդանիներ, բայց դրանք արագ տարածվել են վայրի բնության մեջ:
Մի շարք փորձագետների կարծիքով՝ աֆրիկական մագիլավոր գորտերի ներկայացուցիչները որոշ մարզերից պետք է վերացվեն՝ տեղական վայրի բնությունը պաշտպանելու համար:
