Հայաստանի 7-րդ գումարման խորհրդարանի պատգամավորներին մանդատների հանձնումն ավելի շատ խորհրդանշական միջոցառում է։
Այս մասին NEWS.am-ի թղթակցին տված հարցազրույցում հայտարարել է ԿԸՀ քարտուղար Արմեն Սմբատյանը:
Սմբատյանը պարզաբանել է, որ այս արարողության մեջ հատուկ փոփոխություններ չեն սպասվում, բացի այն, որ այն տեղի կունենա Սպենդիարյանի անվան Հայաստանի օպերայի եւ բալետի ակադեմիական թատրոնի շենքում: Բացի դրանից, էլեկտրոնային միջոցով, պատահականության սկզբունքով ընտրվել են 28 ընտրողներ, որոնք մասնակցել են անցյալ տարվա արտահերթ խորհրդարանական ընտրություններին: Նրանք ներկայացնում են բոլոր 13 տարածքային ընտրատեղամասերը, յուրաքանչյուրից երկուական հոգի: Նաեւ ընտրվել են երկու հոգի, որոնք առաջին անգամ են մասնակցել քվեարկությանը եւ որոնք նշում են իրենց ծննդյան օրը հենց դեկտեմբերի 9-ին», - հաղորդել է ԿԸՀ քարտուղարը: Միեւնույն ժամանակ, նա ավելացրել է, որ յուրաքանչյուր տեղամասում պահպանվել է գենդերային իրավահավասարության սկզբունքը:
ԿԸՀ քարտուղարի խոսքերով, իրենք փորձում են գտնել նաեւ ամենատարեց ընտրողին` նրան հնարավորություն ընձեռելով մասնակցելու պատգամավորական մանդատների հանձնման հանդիսավոր արարողությանը: Այսպիսով, ի տարբերություն նախորդ տարիների, ընտրողները կկարողանան իրենք մանդատները հանձնել պատգամավորներին, ինչը բավական խորհրդանշական է:
Նա խոստովանել է, որ դեպքեր են եղել, երբ քաղաքացիները հրաժարվել են մասնակցել արարողությանը՝ պատճառաբանելով այն կամ ցանկության կամ ժամանակի բացակայությամբ: Այդ դեպքում համակարգիչը կրկնակի ընտրություն է անցկացրել:
Հարցին, արդյոք արարողությունից հետո պետք է սպասել ինչ-որ հանդիսությունների, տոնական հրավառության կամ ժողովրդական զբոսանքների, Արմեն Սմբատյանը պատասխանել է, որ արարողությունից հետո դրա մասնակիցներին եւ հյուրերին ֆուրշետ է սպասվում, եւ դրանով ամեն ինչ կսահմանափակվի:
Հիշեցնենք, որ պատգամավորները մանդատները կստանան հունվարի 10-ին: