Հայաստանի վարչապետից բացի, կառավարությունում որեւէ մեկը հետաքրքրություն չի ցուցաբերում ներդրումների ներգրավման հարցում: Այս մասին հունվարի 16-ին լրագրողների հետ հանդիպման ժամանակ հայտարարեց տնտեսագետ Թաթուլ Մանասերյանը:
Նրա խոսքով՝ մինչեւ հիմա չի կարելի հայտարարել, որ խնդրի լուծումը ինստիտուցիոնալ բնույթ է ստացել:
«Տնտեսական մարտահրավերների եւ զբաղվածության խնդրի լուծումը քաղաքական հարթությունում է:
Կարելի էր «Նաիրիտը» եւ Վանաձորի քիմիական կոմբինատը բաց բաժնետիրական ընկերության վերածել եւ նաեւ ներքին ներդրումներ ներգրավել: Պետք է հստակ հասկանալ, որ քանի դեռ ներքին ռեսուրսների հաշվին ներդրումներ չկան, դրսից ոչ մի ներդրում չարժե սպասել», - բացատրեց նա:
Փորձագետը նշեց, որ առանց գիտության եւ կրթության ոլորտում լուրջ քաղաքականության անհնար է խոսել գիտելիքահեն տնտեսության ստեղծման մասին:
Շատ ուսանողներ ավարտելուց հետո պարզապես չեն կարողանում աշխատանք գտնել: «Երիտասարդների զբաղվածության խնդիրը երկրի համար ամենալուրջ մարտահրավերներից մեկն է: Կրթական համակարգը ոչնչացրած մարդիկ շարունակում են պաշտոններ զբաղեցնել: Աշխատանքի խնդիրը հնարավոր չէ լուծել միայն ուժային կառույցների եւ բանակի աշխատակիցների աշխատանքային պայմանների բարելավման միջոցով», - ասաց տնտեսագետը:
Թաթուլ Մանասերյանն ընդգծեց, որ եթե այս տարի երկրում սոցիալական եւ տնտեսական կյանքի բարելավման համար լուրջ քայլեր չձեռնարկվեն, ապա երիտասարդ մասնագետների արտահոսքը կավելանա:
«Այսօր շատերին մխիթարում է այն փաստը, որ շուտով մեծ փոփոխություններ կլինեն: Սակայն եթե նրանք 2019 թվականին դրանք չտեսնեն, ապա ապագայում մենք կարող ենք երիտասարդ մասնագետների լուրջ արտագաղթի սպասել: Դրանից խուսափելու համար հարկավոր է վերսկսել այս կամ մեկ այն պաշտոնի համար մրցույթները », - ավելացրեց Թաթուլ Մանասերյանը:
