«Փոխարժեքի փոփոխություններին պետք է մոտենալ փիլիսոփայորեն»,- այսօր նման տարօրինակ հայտարարությամբ հանդես եկավ ՀՀ Ֆինանսների նախարար Տիգրան Դավթյանը, հայտարարելով, որ մի բան հաստատ կարող է ասել, որ «այն տատանվելու է»:
NEWS.am-ի թղթակից հարցին, թե որքա՞ն է նախատեսված դոլարի փոխարժեքը բյուջեի նախագծով, նա պատասխանեց, որ կառավարությունը հրաժարվել է փոխարժեքը բյուջեի նախագծում ամրագրելու մոտեցումից: Դիտարկմանը, թե դրանով, ըստ էության, հասարակությունից թաքցվում է կառավարության կանխատեսումը, քանի որ միեւնույն է կառավարությունը պետք է գոնե իր մտքում ունենա փոխարժեքի իր կանխատեսումը, որով պետք է բյուջետային ծախսերի արտարժութային գործարքներն իրականացնի, Տ. Դավթյանն արձագանքեց. «Մենք իհարկե դա ունենք, որը կախված է վալյուտային ռիսկերի հետ, բայց այդ վալյուտային գործարքները շատ փոքր տոկոս են կազմում»:
Նրա խոսքով, ամենից կարեւորն այն է, որ փոխարժեքի փոփոխությունները լինեն սահուն: Իսկ վերջին շաբաթներին փոխարժեքը սահո՞ւն է տատանվել,հարցին ֆինանսների նախարարը պատասխանեց. «Այդքան բծախնդրորեն չեմ հետեւել փոխարժեքի փոփոխություններին, քանի որ ֆինանսների նախարարի գործառույթների մեջ չի մտնում»: