Թեհրանը Սիրիայում եւ Իրաքում ԱՄՆ հասցրած հարվածները համարում է ահաբեկչություն եւ ԱՄՆ-ից պահանջում է հեռանալ տարածաշրջանից, երկուշաբթի ասել է Իրանի ԱԳՆ պաշտոնական ներկայացուցիչ Աբաս Մուսավին, տեղեկացնում է ՌԻԱ «Նովոստի»-ն։

«ԱՄՆ ռազմական ագրեսիան Իրաքի եւ իրաքյան ուժերի դեմ  ԱՄՆ ահաբեկչության ուղղակի ապացույցն է, (Թեհրանը) դատապարտում է այն»,- ասել է Մուսավին, որի խոսքերը հրապարակվել են գերատեսչության Telegram-ալիքում։

Նա ԱՄՆ-ից պահանջել է դադարեցնել միջամտություններն Իրաքի ներքին գործերին, ինչպես նաեւ նշել է, որ օտարերկրյա զորքերի ներկայությունը տարածաշրջանում հանգեցնում է միայն լարվածության խորացմանը։ Այս առնչությամբ Մուսավին ԱՄՆ-ից պահանջել է «դադարեցնել իր օկուպացիոն ներկայությունը»։

Ավելի վաղ Պենտագոնում հայտարարել էին, որ ԱՄՆ-ը հարվածներ է հասցրել Իրաքում եւ Սիրիայում «Քաթաիբ Հեզբոլլահ» շարժման օբյեկտներին՝ «ի պատասխան իրաքյան ռազմակայանների դեմ շարունակվող գրոհների»։ Պաշտպանական գերատեսչությունում ասել են, որ այդ գործողությունները ձեռնարկվել են որպես պատասխան Քիրքուկի մոտ գտնվող իրաքյան բազայի դեմ շարժման գրոհների, որոնք հանգեցրել են ԱՄՆ քաղաքացու մահվանը եւ չորս ամերիկացի զինծառայողի վիրավորվելուն։ Պենտագոնում նշել են, որ այդ հարվածներն ուղղված են այն բանին, որպեսզի նվազեցնեն խմբավորման հնարավորությունը՝ «ապագայում կոալիցիայի ուժերի դեմ գրոհներ» իրականացելու հարցում։ ԱՄՆ-ը մեղադրում է Իրանին «Հեզբոլլահին» ֆինանսավորելու մեջ։