Մարտի 25-ից Ուզբեկստանի իշխանությունները մինչեւ 70 դոլարի չափով տուգանք են սահմանում հասարակական վայրերում պաշտպանիչ բժշկական դիմակ չկրելու համար, կիրակի հայտնել են երկրի կառավարությանն առնթեր օպերատիվ շտաբում, հաղորդում է ՌԻԱ Նովոստի-ն:
Ուզբեկստանի առողջապահության նախարարություն տվյալներով՝ մարտի 15-ին երկրի բնակչուհու մոտ, որը վերադարձել էր Ֆրանսիայից, հայտնաբերվել է COVID-19-ի հանրապետությունում առաջին դեպքը: Կիրակի առավոտյան վարակվածների թիվը հասել է 42-ի: Երկրի իշխանությունները դադարեցրել են տրանսպորտային հաղորդակցությունն ուրիշ երկրների հետ մարտի 16-ից մինչեւ ապրիլի 30-ը կորոնավիրուսի տարածման վտանգի կապակցությամբ, իսկ մարտի 23-ից փակ կլինեն սահմանակետերը երկիր մուտք գործելու համար:
«Մարտի 23-ից քաղաքացիներին արգելվում է հայտնվել Տաշկենտի եւ շրջկենտրոնների հասարակական վայրերում առանց պաշտպանիչ բժշկական դիմակների, մարտի 25-ից այդ արգելքը խախտելու համար կսահմանվի տուգանք»,-ասվում է օպերատիվ շտաբի Telegram-ալիքում տեղադրված հայտարարության մեջ: Արգելքի խախտումը կտուգանվի շուրջ 23 դոլարի չափով, իսկ կրկնակի խախտման դեպքում տուգանքը կկազմի շուրջ 70 դոլար:
