Սահմանափակումների ամբողջ իմաստն այն է, որ մարդիկ քիչ շփվեն, ինչը թույլ կտա կանխել կորոնավիրուսի տարածումը: Այս մասին մարտի 27-ին մամուլի ասուլիսի ժամանակ ասաց տարածքային կառավարման եւ ենթակառուցվածքների փոխնախարար Արմեն Սիմոնյանը:
Փոխնախարարը հիշեցրեց, որ արգելվել էր նաեւ մեկ մեքենայում 2-ից ավելի մարդու փոխադրումը:
«Այս սահմանափակումների էությունն այն է, որ այն ուղեւորները, որոնք պետք է տեղաշարժվեին միջմարզային տրանսպորտով, չփոխադրվեն, այդ թվում՝ նաեւ մինչեւ 8 տեղ ունեցող մարդատար ավտոմեքնաներով: Այսինքն՝ այն նույն ուղեւորները, որոնց կարող էին փոխադրել ավտոբուսներով, չպետք է փոխադրեն մարդատար ավտոմեքենաներով»,- պարզաբանեց Սիմոնյանը:
Մեկ ընտանիքի անդամների համար նման սահմանափակումների տրամաբանական լինելու մասին հարցն անպատասխան մնաց: Փոխնախարարը ուշադրությունը կենտրոնացրեց տաքսիներով ուղեւորության վրա՝ դա պատճառաբանելով նրանով, որ մեկ ուղեւորը կարող է վարորդից առավելագույն հեռու նստել, ինչն անհնար է 2 ուղեւորի դեպքում: Ինչո՞ւ չեն կարող մեկ ընտանիքի 3 անդամները միասին երթեւեկել հարցն այդպես մնաց առանց ողջամիտ բացատրության:
Հիշեցնենք, որ Հայաստանում մարտի 16-ից ապրիլի 14-ը կորոնավիրուսի տարածումը կանխելու նպատակով գործում է արտակարգ դրության ռեժիմ: