Եթե իրավիճակն իրականում այդքան սուր է, ապա մեզ պետք է այդ մասին հայտնեին: Այս մասին մարտի 31-ին ԱԺ-ում ավանդական ճեպազրույցների ժամանակ ասաց «Բարգավաճ Հայաստան» կուսակցության խմբակցության քարտուղար Արման Աբովյանը՝ տարակուսանք հայտնելով, որ իշխանությունները համառորեն փորձում են առաջ մղել «Արտակարգ դրության իրավական ռեժիմի մասին» օրենքում եւ կից օրենքներում փոփոխություններ կատարելու մասին օրինագծերի փաթեթը:
Նա պարզաբանեց, որ խմբակցությունը դեմ է փոփոխություններին: «Այսպիսի փոփոխությունների ընդունումը պետք է ուղեկցվի պատճառների հստակ հիմնավորմամբ, ինչը չի արվել, այդ թվում՝ փոփոխությունները ներկայացրած արդարադատության նախարար Ռուստամ Բադասյանի կողմից»,- նշեց պատգամավորը:
Արման Աբովյանը վստահ է, որ հիմա այսպիսի օրենքի ընդունումն արդեն ոչ արդյունավետ կլինի: «Դրանից բացի, անհասկանալի է, թե տեղեկությունները ինչու պետք է մեկ ամիս պահվեն, եթե կարանտինը տեւում է 2 շաբաթ, եւ ինչու օրենքը չի տարածվում միայն նրանց վրա, ովքեր ռիսկի գոտում են: Կարելի էր գտնել քաղաքացիների շփումների շրջանակի որոնման այլ եղանակներ՝ չթափանցելով մարդու մասնավոր կյանքի մեջ»,- ամփոփեց նա:
Նշենք, որ օրենսդրական փոփոխություններով նախատեսվում է, որ ԱԴ ռեժիմի պայմաններում համապատասխան մարմինները հասանելիություն են ստանում հանրային էլեկտրոնային ցանցի տվյալների հավաքմանը: Կառավարությունը հնարավորություն կունենա հետեւելու քաղաքացիների գտնվելու վայրին, նրանց տեղաշարժին, համացանցային միացումներին, շփումներին, նրանց հետ կապված հեռախոսահամարներին, համարների վերահասցեագրմանը, ինչպես նաեւ զանգերին, դրանց տեւողությանը, սակայն Արդարադատության նախարարության հավաստիացմամբ՝ ոչ զրույցների բուն բովանդակությանը:
