Corona ապրանքանիշի մեքսիկական մասնաճյուղը դադարեցնում է արտադրությունը` երկրում COVID-19-ի հետ կապված առողջական արտակարգ իրավիճակի պատճառով հայտնում է AFP-ն:
Grupo Modelo-ն հայտարարել է, որ այդ միջոցը համապատասխանում է Մեքսիկայի Կառավարության` մինչեւ ապրիլի 30-ը կորոնավիրուսի տարածումը դանդաղեցնելու նպատակով բոլոր ոչ հրատապ գործողությունները դադարեցնելու հրահանգին: «Մենք մեր գործարաններում արտադրության կրճատման գործընթացի մեջ ենք»,- ասել են ընկերությունում: Մեքսիկայի կառավարությունը հայտարարել է, որ շարունակել գործել կարող են միայն տնտեսության կարեւորագույն ճյուղերը, ինչպիսին է գյուղատնտեսությունը:
Reforma թերթը եւս հայտնել է, որ Մեքսիկայում գարեջրի եւս մի խոշոր արտադրողը` Heineken-ը, որը թողարկում է Tecate եւ Dos Equis ապրանքանիշերը, նույնպես կարող է դադարեցնել աշխատանքը, չնայած ընկերությունը դեռ չի հաստատել հաղորդագրությունը:
Կորոնավիրուսի պանդեմիայի սկզբից Corona գարեջուրը կատակների եւ մեմերի թիրախ էր դարձել: Համացանցում լուրեր էին շրջանառվում, որ կորոնավիրուսի բռնկումից հետո ԱՄՆ-ում այս գարեջրի վաճառքը նվազել է մոտ 40 տոկոսով:
Սակայն փետրվարի վերջին Constellation Brands կորպորացիան, որին եւ պատկանում է Corona լեյբլը, հերքել էր լուրերը եւ հայտարարել, որ ԱՄՆ-ում վաճառքները չեն նվազել:
