Իրանի ղեկավարության ներսում ներկա տարաձայնությունները սպասվող ընտրությունների նախապատրաստություն են: NEWS.am-ի թղթակից հետ զրույցում նման տեսակետ հայտնեց ԵՊՀ իրանագիտության ամբիոնի վարիչ Գառնիկ Ասատրյանը, անդրադառնալով Իրանի նախագահ Մահմուդ Ահմադինեջադի կառավարության նիստերին չմասնակցելուն եւ Կում քաղաքի իր այցելությունը չեղյալ համարելուն:
Հիշեցնելով Իրանի նախագահի եւ հոգեւոր առաջնորդ այաթոլլա Ալի Խամենեին միջեւ տարաձայնությունների մասին, փորձագետը կարծիք հայտնեց, որ տվյալ դեպքում, խոսքն, ըստ էության, գնում է երկու մոտեցումների բախման մասին, որոնցից մեկը արմատական Խամենեինն է, մյուսն ավելի պոպուլիստական Ահմադինեժադինը: Այդ համատեքստում, նա նշեց, որ Ահմադինեժադի թիմը փորձում է գրավել հասարակության համակրանքը առաջիկա ընտրությունների նախաշեմին:
Հիշեցնենք, որ Իրանի երկու լիդերների միջեւ լարվածության ֆորմալ պատճառը Ահմադինեժադի կողմից ապրիլի 17-ին հետախուզության փոխնախարար Մոսլեհին աշխատանքից ազատելն է եղել, որին Խամենեին անմիջապես վերականգնել է նույն պաշտոնում:
Իրանի Սահմանադրության համաձայն, երկրի նախագահն իրավունք ունի նախարարներ նշանակել, որոնց հետո հաստատում է խորհրդարանը: Իրանի խորհրդարանի շուրջ 300 անդամներ խնդրել են Ահմադինեժադին հարգել այաթոլլա Խամենեի կամքն ու ցանկությունը: Մի շարք վերլուծաբանների կարծիքով, բոլոր խնդիրների պատճառը թաքնված է երկրի փոխնախագահ Էսֆանդիար Ռահիմ Մաշայիի հետ, ում շատերը համարում են Իրանի իրական նախագահ: Խոսակցությունների համաձայն, Մաշային, ով Ահմադինեժադի հետ աշխատել է շուրջ 25 տարի, լինելու է երկրի հաջորդ նախագահը: Պահպանողականները քննադատում են Մաշայիին ազգայնական հայացքների, նաեւ մշակութային եւ սոցիալական հարցերում ազատական մոտեցումների համար:
