Եգիպտոսում COVID-19-ով վարակման դեպքերի թիվը գերազանցել է 35 հազարը, գրանցվել է վարակի գրեթե 1.4 հազար նոր դեպք, հայտնել են երկրի առողջապահության նախարարությունում, փոխանցում է «ՌԻԱ Նովոստի»-ն:
«Գրանցվել է կորոնավիրուսի ախտորոշման թեստերի 1365 նոր դրական արդյունք, դրանք գրանցվել են հիվանդների հետ նախկինում շփվածներին հետեւելու ընթացակարգի միջոցով: Մեկ օրվա ընթացքում 34 մարդ է մահացել հիվանդությունից»,- նշվում է գերատեսչության պաշտոնական ներկայացուցիչ Խալեդ Մուգահեդի տարածած հայտարարության մեջ: Դեպքերի մեծ մասը գրանցվել է Կահիրեի հյուսիսային նահանգներում, Գիզայում, Քալյուբիայում:
Մուգահեդի խոսքով՝ բոլոր նոր հիվանդները գտնվում են կորոնավիրուսային հիվանդանոցներում եւ բուժօգնություն են ստանում ԱՀԿ ցուցումների համաձայն:
«Եգիպտոսում կորոնավիրուսով հիվանդների ընդհանուր թիվը 35.444 մարդ է, առողջացել է 9375 մարդ, մահացել է 1.271 մարդ»,- հայտնել է Մուգահեդը:
Առողջապահության նախարար Հալա Զայդը Nile-ին տված հարցազրույցում ասել է, որ Եգիպտոսը սկսել է աստիճանաբար վերադառնալ «կյանքի նորմալ ռիթմի»: Ըստ նրա՝ եգիպտական իշխանությունները նախընտրեցին հենց մասնակի, այլ ոչ թե լիամասշտաբ կարանտին ներդնել՝ պայքարելով կորոնավիրուսի դեմ:
Եգիպտոսում կորոնավիրուսի կապակցությամբ պարետային ժամ է գործում՝ երեկոյան 8-ից մինչեւ 5:00, կինոթատրոնները եւ զվարճանքի այլ վայրեր, սրճարաններն եւ ռեստորանները փակ են, գործում է միայն առաքումը: