Բնապահպանական կազմակերպությունները ահազանգում են օվկիանոսի աղտոտվածության աճի համար, որը պայմանավորված է կորոնավիրուսի համավարակի հետեւանքով առաջացած թափոնների աճով:
Միլիոնավոր մարդիկ ամբողջ աշխարհում կրում են դիմակներ ու լատեքսային ձեռնոցներ, եւ թեեւ դա օգնում է դանդաղեցնել վիրուսի տարածումը, դրանք ճիշտ չեն վերամշակվում, զգուշացնում են խմբերը:
Facebook-ում հրապարակված տեսանյութի համաձայն, ֆրանսիական Opération Mer Propre հասարակական կազմակերպությունից Լորան Լոմբարդը, ով զբաղվում է օվկիանոսի մաքրմամբ, ասել է, որ «շուտով Միջերկրական ծովի ջրերում ավելի շատ դիմակներ կլինեն, քան մեդուզաներ»:
Տեսանյութում երեւում են մեկանգամյա օգտագործման ձեռնոցներ եւ դիմակներ, որոնք ցրված են ծովի հատակին՝ ֆրանսիական Ռիվերայի Անտիբա ափի մոտ։
Opération Mer Propre-ից Ջոֆրի Պելտյեն The Guardian-ին ասել է, որ դայվերները սկսել են նկատել ավելի շատ «COVID թափոններ»` դիմակներ, ձեռնոցներ եւ ձեռքերի ախտահանման միջոցների պլաստիկ շշեր:
«Մոտ 100 մետր երկարությամբ լողափին մենք գտանք մոտ 70 դիմակ»,- ասել է Գարի Սթոուքսը՝ OceansAsia-ից: Եւս 30 դիմակ հայտնաբերվեց մեկ շաբաթ անց, ասել է նա՝ հավելելով․ «Եվ սա անմարդաբնակ կղզում»:
Միացյալ Նահանգներում բնապահպանական կազմակերպությունները նման մտահոգություններ են հայտնել COVID-19-ի պատճառով պլաստիկ աղտոտման աճի վերաբերյալ:
Ocean Conservancy-ում «Օվկիանոսային ծով» ծրագրի ավագ տնօրեն Նիք Մալոսը ասել է, որ բժշկական թափոնների ոչ ճիշտ վերամշակումը վաղուց սպառնալիք է հանդիսանում օվկիանոսների եւ ջրային ուղիների համար:
