![](img/news/58/53/21/default.jpg)
Թբիլիսիի ինֆեկցիոն հիվանդանոցում շարունակում է բուժվել COVID-19-ով վարակված 40 պացիենտ, որոնցից երեքը հոսպիտալացվել են այսօր։ Այդ մասին լրագրողներին հայտնել է հիվանդանոցի վերակենդանացման բաժանմունքի ղեկավար Մարինա Էնդելաձեն, հաղորդում է Նովոստի-Գրուզիա-ն։
Նրա խոսքով՝ այս փուլում բոլոր նոր պացիենտների վիճակը կայուն է։ Նրանց վարակման աղբյուրները հայտնի են։
«Նրանցից մեկը վերաբերում է «Սաբուրտալո կլաստերին», իսկ երկուսը գտնվել են կարանտինի գոտիներում՝ մեկը ժամանել էր Մոսկվայից, մյուսը՝ Երեւանից»,-ասել է Էնդելաձեն։
Վերջին օրվա ընթացքում Վրաստանում հայտնաբերվել է կորոնավիրուսով 13 վարակակիր։ Հայտնի է, որ չորս նոր դեպքերը գրանցվել են Մուշեւանի գյուղում, որն ապրիլի 25-ից փակ է կարանտինի համար, ինչպես նաեւ վարակվել է Թբիլիսիի Հանրապետական հիվանդանոցի մայրապետերից մեկը։
Փետրվարի 26-ից մինչեւ հունիսի 14-ը Վրաստանում հաստատվել է կորոնավիրուսով վարակման 864 դեպք։ Կորոնավիրուսի հետեւանքով մահացել է 14 մարդ։ Առողջացածների ընդհանուր թիվը կազմում է 703։
Ներկայում Վրաստանի կովիդ-կենտրոններում շարունակում է բուժվել 147 մարդ։ Կարանտինում դեռեւս գտնվում է 2 795 մարդ, իսկ ստացիոնարում բժիշկների հսկողության ներքո՝ 252 պացիենտ։