Կորոնավիրուսի համաճարակի երկրորդ փուլի դեպքում Վրաստանում խորհրդարանական ընտրությունները կարող են հետաձգվել մինչեւ դեկտեմբեր, հայտարարել է «Վրացական երազանք» իշխող կուսակցության քարտուղար, խորհրդարանի նախկին խոսնակ Իրակլի Կոբախիձեն, հաղորդում է Նովոստի-Գրուզիա-ն։

«Եթե երկրորդ ալիքը լինի, որը կհամընկնի ընտրությունների շրջանի հետ, հավանաբար, պարտադիր կլինի հայտարարել արտակարգ դրություն։ Դա ողբերգություն չէ։ Բնականաբար, եթե դա տեղի ունենա հոկտեմբերին, ապա ընտրությունները չեն կայանա եւ կհետաձգվեն մինչեւ դեկտեմբեր»,-ասել է Կոբախիձեն «Իմեդի» հեռուստաալիքի եթերում։

Վրաստանում խորհրդարանական ընտրությունները նախատեսված է անցկացնել հոկտեմբերի 31-ին։ Նախընտրական քարոզարշավը պաշտոնապես կմեկնարկի օգոստոսի վերջում՝ ընտրություններից 60 օր առաջ։

Կորոնավիրուսի տարածումը կանխելու համար Վրաստանում արտակարգ դրության ռեժիմ էր սահմանվել մարտի 21-ից մինչեւ մայիսի 23-ը, իսկ ապրիլի 27-ից իշխանությունները սկսել էին աստիճանաբար մեղմացնել սահմանափակումները։ Այդուհանդերձ, մինչեւ հուլիսի 15-ը երկրում կշարունակեն գործել մի շարք սահմանափակումներ եւ արգելքներ, որոնք ամփոփված են «Կարանտինում մեկուսացման մասին» կառավարության որոշման մեջ։