Կարծում եմ՝ բացի մեզնից, մնացած բոլորը ինչ-որ ձեւով ինչ-որ ակնկալիքներ ունեին ՄԻԵԴ-ից, մենք որեւէ ակնկալիք չունեինք, որ ՄԻԵԴ-ը «միջանկյալ» միջոց կկիրառի եւ ակնկալիք էլ չունեինք, որ այս որոշման հետ կապված որեւէ միջազգային կառույց հակառակ դիրքորոշումը կցուցաբերի: Այս մասին, այսօր՝ հուլիսի 9-ին, ԱԺ-ում լրագրողների հետ զրույցում նշեց ԱԺ փոխխոսնակ Ալեն Սիմոնյանը՝ անդրադառնալով ՄԻԵԴ-ի երեկվա որոշմանը, որով մերժվել է ՍԴ արդեն նախկին երեք անդամների եւ Հրայր Թովմասյանի դիմումը, որով հերջիններս առաջարկում էին «միջանկյալ միջոց» կիրրառել,որով կկասեցվեին սահմանադրական փոփոխությունները:
«Պարոն Թովմասյանի եւ իրեն մերձ տարբեր լրատվամիջոցների ու գործիչների ցանկությունն է փոքր բաժակում փոթորիկ ստեղծելը, բայց արդեն որերորդ անգամ է, երբ գնում են դրսից մեզ վրա տղա բերելու տրամաբանությամբ, լինի Բրյուսելից, թե Մոսկվայից, կարծես թե չի ստացվում ու չի էլ ստացվելու»,-ասաց նա:
Հարցին, թե Հրայր Թովմասյանն այդ ճանապարհո՞վ է գնում, Սիմոնյանը պատասխանեց. «Կարծում եմ, որ եթե Հրայր Թովմասյանը հնարավորություն ունենա հիմա իմ հարցազրույցի ժամանակ այստեղի լույսն անջատի, որ ես չկարողանամ հարցազրույց տամ, ինքը դա կանի: Ինքը դրա փորձն ունի, ես կոնկրետ բանի հետ կապված եմ ասում, չեմ ուզում ավելի մանրանամ: Ես վստահ եմ, որ ինքն ամեն ինչ կանի, որպեսզի կառչած մնա այդ աթոռից»: